Ish-zëvendëskryeministrja Belinda Balluku u paraqit sot për herë të parë në GJKKO, pasi kjo e fundit e pezulloi nga detyra dhe i bllokoi pasaportën. Balluku, u paraqit në ambientet e SPAK rreth orës 9:10 dhe doli prej aty pas gati 40 minutash. Ish-zyrtarja e lartë, vendosi që të mos bënte asnjë koment për mediat, as në hyrje dhe as në dalje, ndonëse gazetarët tentuan që t’i merrnin asaj një prononcim.
E heshtur, nën shoqërinë e shoqëruesit të saj, Balluku la ambientet e GJKKO, ndërkohë që dy avokatët e saj, e motra, Pamela Qirko dhe Ardian Kalia, qëndruan, për t’u njohur me aktet e dosjes. Ndaj edhe për këtë shkak gjykata vendosi që të shtynte seancën për 2 orë, duke iu lënë më shumë kohë avokatëve të zonjës Balluku, por dhe të vartësve të saj.
Deri më tani nuk dihet se çfarë ka dëshmuar Balluku, por dhe dy zyrtarët e tjerë.
SEANCA
Në një lidhje live për News24, gazetarja Klodiana Lala raportoi se Balluku duket se ka përforcuar mbrojtjen e saj. Mësohet se krahas motrës, Pamela Qirko, pjesë e ekipit është dhe avokati Ardian Kalia.
GJKKO thekson se tre të pandehurit janë pjesë e procedimit penal nr. 136/2025 të SPAK-ut, që lidhet me procedurat e tenderave për tunelin e Llogarasë dhe Unazën e Madhe të Tiranës, ku dyshohen për paracaktimin e kontraktorëve fitues.
Seanca po zhvillohet për marrjen në pyetje, si edhe verifikimin e kushteve, kritereve të caktimit të masës dhe nevojat e sigurimit për të pandehurit Belinda Balluku, Gentian Gjyli e Erald Elezi.
Gjykata e Posaçme vendosi dy ditë më parë masën e pezullimit nga detyra për Belinda Ballukun si dhe i ndaloi daljen jashtë vendit. Ndërsa për Gentian Gjylin, drejtor i ARRSH dhe Erald Elezin, administrator i KESH, u vendos masa e sigurisë “arrest shtëpie”. Çështja për Ballukun ka shkuar në Gjykatë Kushtetuese, ndërsa kryeministri Edi Rama, në deklaratën e tij të parë publike për këtë çështje, theksoi se do ta respektonin vendimin, por do ta çonin në Kushtetuese pasi ishte cenuar pushteti ekzekutiv. Dhe pak orë pas deklaratës së tij, dje në mesditë, Kryeministria çoi në Kushtetuese kërkesën për ankimim të vendimit të GJKKO.
Balluku po hetohet për tenderin e tunelit të Llogarasë si dhe për lotin nr.4 të Unazës së Madhe, ndërsa akuzohet për shkelje të barazisë në tendera.
