Forcat e Gardës Revolucionare të Iranit filluan sot stërvitje ushtarake në Gjirin Persik, duke dërguar paralajmërime ndaj anijeve luftarake amerikane që ndodhen në zonë.
Sipas televizionit shtetëror, këto stërvitje nxjerrin në pah “sakrificën dhe shpirtin e rezistencës” të forcave detare të Gardës Revolucionare (IRGC) “për të përballuar çdo kërcënim” pas konfliktit me Izraelin në qershor.

Forcat detare i dërguan paralajmërime anijeve amerikane në rajon, duke u përcjellë një mesazh të ashpër, megjithëse përmbajtja e mesazheve nuk u bë e njohur.
Forcat amerikane në Gjirin Persik nuk kanë bërë asnjë koment.

Gardistët, ushtria ideologjike e Republikës Islamike të Iranit, kanë vendosur gjithashtu sisteme mbrojtjeje kundër ajrit, të cilat sipas mediave shtetërore janë “të afta të identifikojnë objektivat ajrore dhe detare me ndihmën e inteligjencës artificiale”.

Zëvendëskomandanti i Gardës Revolucionare, Ali Fadavi, deklaroi të mërkurën se “asnjë vend nuk mund të kufizojë rolin e Gjirit të Hormuzit” dhe premtoi se Gardistët do të mbrojnë këtë rrugë detare strategjike.

Çdo vit, rreth 20% e eksporteve globale të naftës kalon përmes Gjirit Persik dhe ngushticës strategjike të Hormuzit.
“Siguria e Gjirit Persik është linja e kuqe e Iranit,” shtoi ai, duke paralajmëruar kundërshtarët, SHBA dhe Izraelin, të cilët i cilëson si “aktorët kryesorë të pasigurisë globale”, sipas agjencisë zyrtare të lajmeve IRNA.

Gardistët kanë konfiskuar herë pas here anije të huaja që lundrojnë në Gjirin Persik nën akuzën e kontrabandës së karburantit.
Sulmi i papritur i Izraelit ndaj Iranit më 13 qershor shkaktoi një konflikt 12-ditor midis dy vendeve, gjatë të cilit SHBA goditi tre objekte të rëndësishme bërthamore iraniane.

Sulmet, që shkaktuan vdekjen e mijëra njerëzve, përfshirë komandantë të lartë të Gardës, çuan në kundërpërgjigje iraniane me dronë dhe raketa, duke shkaktuar dhjetëra viktima.