Ambasadori i SHBA në Francë, Charles Kushner, kërkoi leje për të vizituar ish-presidentin Nicolas Sarkozy në burg gjatë periudhës së shkurtër të paraburgimit të këtij të fundit, sipas Gjykatës së Apelit në Paris, e cila ia dha miratimin.

Megjithatë, takimi nuk u zhvillua kurrë, tha një burim pranë Sarkozy, edhe pse Kushner dhe ish-presidenti u takuan më vonë jashtë burgut, sipas Reuters.
Sarkozy, i cili udhëhoqi Francën nga viti 2007 deri në 2012, u lirua muajin e kaluar pas tre javësh burgim, teksa ai po apelon dënimin për komplot në lidhje me mbledhje fondesh nga Libia. Ai e ka mohuar në mënyrë të përsëritur çdo akuzë.

Kushner, djali i të cilit, Jared, është i martuar me Ivanka Trump, vajzën e presidentit amerikan Donald Trump, ka shkaktuar reagime që nga momenti kur mbërriti në Paris si ambasador në fillim të vitit.

Ai vetë ka vuajtur më parë një dënim me burg në SHBA për donacione të paligjshme në fushatë dhe evazion fiskal, mes akuzave të tjera. Në vitin 2020 u fal nga presidenti Trump.

Nuk dihet pse Kushner kërkoi të takohej me Sarkozy, të cilin e vizitoi gjithashtu në burg edhe ministri francez i Drejtësisë, Gerald Darmanin.

Një burim pranë Sarkozy refuzoi të jepte detaje të mëtejshme dhe u mjaftua të thoshte se ish-presidenti planifikon të shkruajë për këtë episod në librin e tij të ardhshëm, “Ditari i një të Burgosuri”, që pritet të dalë javën e ardhshme.

Kujtojmë se në gusht, Kushner u thirr në Ministrinë e Jashtme franceze pasi publikoi një letër të hapur drejtuar presidentit Emmanuel Macron, ku pretendonte se Franca nuk kishte bërë mjaftueshëm për të ndalur dhunën antisemitike.

Në shtator, kur një gjykatë në Paris vendosi që Sarkozy duhet të burgosej, ish-kreu i shtetit francez deklaroi se vendimi minonte shtetin e së drejtës dhe besimin e qytetarëve te drejtësia.