Nënkryetari i Këshillit Bashkiak të Tiranës, Dorian Teliti, ka reaguar ashpër pas miratimit të projektbuxhetit 2026 të Bashkisë Tiranë, duke e cilësuar procesin si një “akt të pastër arrogance” nga mazhoranca e majtë dhe një shkelje të parimeve të demokracisë vendore. Sipas Telitit, gjatë seancës së votimit mazhoranca ka vepruar në kundërshtim me rregulloren, duke përjashtuar nga votimi propozimet e opozitës dhe duke shpërfillur interesin publik. Ai bëri të ditur se grupi i këshilltarëve të Partisë Demokratike kishte depozituar paraprakisht 29 amendamente, të hartuara mbi shqetësimet e qytetarëve, familjeve, të rinjve, shtresave në nevojë dhe sipërmarrjes në kryeqytet.

Teliti theksoi se mazhoranca refuzoi amendamente që parashikonin, ndër të tjera, uljen me 30% të taksës së pronës, përgjysmimin e tarifës së pastrimit dhe parkimit, si dhe uljen e taksës së ndikimit në infrastrukturë për ndërtimet e reja, masë që sipas tij do të ndihmonte çiftet e reja në blerjen e banesave.

Sipas deklaratës, u rrëzuan gjithashtu propozime për çerdhe dhe kopshte falas, subvencionimin e ushqimit për nxënësit, kompensimin e çmimit të ujit deri në furnizim 24 orë, si dhe subvencione direkte për fermerët e Tiranës.

Teliti akuzoi mazhorancën se i tha “PO abuzimit me fondet”, duke refuzuar amendamente që synonin ndalimin e pagesave për shërbime të pakryera, uljen e shpenzimeve operative dhe administrative, si dhe eliminimin e fondeve për marketing dhe evente propagandistike, në favor të shërbimeve sociale dhe mbështetjes për të moshuarit. Në përfundim, nënkryetari i Këshillit Bashkiak ftoi qytetarët që të hënën, në orën 18:00, të mblidhen në bulevardin “Dëshmorët e Kombit”, për të reaguar kundër asaj që ai e cilësoi si arrogancë, përjashtim social dhe shpërdorim të parasë publike.

Deklarata e nënkryetarit të Këshillit Bashkiak të Tiranës, Dorian Teliti:

Të nderuar qytetarë të Tiranës,
Miratimi i projektbuxhetit 2026 të Bashkisë Tiranë nga mazhoranca e majtë në Këshillin Bashkiak ishte një akt i pastër arrogance dhe një shkelje flagrante e parimeve themelore të qeverisjes dhe demokracisë vendore. Gjatë seancës së votimit, në kundërshtim të hapur me rregulloren, mazhoranca përjashtoi propozimet e opozitës dhe shpërfilli interesin publik. Grupi i këshilltarëve të Partisë Demokratike kishte depozituar paraprakisht 29 amendamente, të hartuara mbi bazën e shqetësimeve reale të qytetarëve, të të rinjve, familjeve, shtresave në nevojë dhe sipërmarrjes së kryeqytetit. Këto amendamente synonin korrigjimin e një projektbuxheti klientelist, të padrejtë dhe të shkëputur nga realiteti social e ekonomik i Tiranës.

Mazhoranca i tha JO qytetarëve

Duke refuzuar t’i fusë në votim 29 amendamentet tona, mazhoranca socialiste i tha JO:

• Uljen me 30% të taksës së pronës

• Përgjysmimin e tarifës së pastrimit për familjet dhe bizneset

• Përgjysmimin e tarifave të parkimit

• Uljen e taksës së ndikimit në infrastrukturë për ndërtimet e reja, masë që do të ulte çmimin e banesave për çiftet e reja.

Mazhoranca i tha JO:

• Çerdheve dhe kopshteve falas

• Subvencionimit të ushqimit për nxënësit

• Kompensimit të çmimit të rritur të ujit, derisa Tirana të ketë furnizim 24 orë

• Subvencioneve direkte për fermerët e Tiranës

Amendamentet tona parashikonin investime të domosdoshme në arsim, siguri dhe të ardhmen e të rinjve, duke përfshirë ndërtimin e institucioneve të reja arsimore, rritjen e sigurisë pranë tyre dhe krijimin e kapaciteteve publike për strehimin studentor. Refuzimi i këtyre investimeve tregon se për mazhorancën prioritet nuk është e ardhmja e qytetit, por mbajtja e pushtetit me çdo kusht.

Mazhoranca i tha PO abuzimit me fondet

Amendamentet tona synonin:

• Ndalimin e pagesave për shërbime që nuk ekzistojnë, duke filluar nga inceneratori inekzistent

• Uljen e shpenzimeve operative dhe administrative

• Eliminimin e fondeve për marketing dhe evente propagandistike

• Alokimin e këtyre fondeve drejt shërbimeve sociale, qendrave komunitare dhe mbështetjes për të moshuarit

Të gjitha këto u rrëzuan pa asnjë argument.

Të dashur qytetarë,

Buxheti prej mbi 400 milionë euro për vitin 2026, i miratuar vetëm me votat e mazhorancës dhe i kundërshtuar fort nga opozita, nuk i jep zgjidhje asnjë prej sfidave të vërteta të kryeqytetit. Është një buxhet për propagandë dhe klientelë; një buxhet që mban gjallë modelin e qeverisjes pa transparencë dhe pa llogaridhënie; një buxhet që rëndon qytetarët dhe bizneset.

Ky akt është një arsye më shumë për të reaguar ndaj arrogancës, përjashtimit social, vjedhjes dhe shpërdorimit të parasë publike.

Ditën e hënë, ora 18:00, ju ftojmë të gjithë të mblidhemi në bulevardin “Dëshmorët e Kombit”, për të mbrojtur interesin publik dhe për të kërkuar një qeverisje që punon për njerëzit – jo për pushtetin dhe orekset e tij.