Gjykata Federale e Lartë e Brazilit autorizoi të premten ish-Presidentin Jair Bolsonaro t’i nënshtrohet një ndërhyrjeje kirurgjikale, ndërsa Presidenti Luiz Inacio Lula da Silva u zotua të vërë veton ndaj një projektligji të Kongresit që mund të ulë dënimet për Bolsonaronon dhe të tjerë të dënuar për një grusht shteti të tentuar.
Gjykatësi Alexandre de Moraes, i cili mbikëqyr çështjen e Bolsonaros, vendosi që ish-presidenti, i cili aktualisht po vuan një dënim me 27 vjet e tre muaj burg për udhëheqjen e grushtit të shtetit të vitit 2022, mund t’i nënshtrohet ndërhyrjes kirurgjikale të rekomanduar nga një bord mjekësor i Policisë Federale. Procedura ka për qëllim trajtimin e një hernie inguinale bilaterale dhe, ndonëse nuk është një urgjencë, duhet të kryhet “sa më shpejt të jetë e mundur” për të parandaluar ndërlikimet.
Në të njëjtin vendim, Moraes hodhi poshtë kërkesën për arrest shtëpiak të paraqitur nga mbrojtja e ish-presidentit.
Lula riafirmoi të premten se do të vinte veton ndaj një projektligji të kongresit që rishikon disa llogaritje dënimesh, të cilat mund të ulin dënimet me burg për Bolsonaronon dhe të dënuar të tjerë për grusht shteti.
“Me gjithë respektin e duhur për deputetët dhe senatorët që votuan për uljen e dënimit, dua t’u them atyre se do ta vë veton ndaj atij ligji”, deklaroi Lula gjatë një aktiviteti në Sao Paolo.
Megjithatë, Lula shtoi se nëse ai lëshon një veto, Kongresi do të ketë ende autoritetin për ta anashkaluar atë në një votim të mëvonshëm — një hap që mund t’i sjellë dobi Bolsonaros .
