Gjykata Supreme e Brazilit miratoi të martën kërkesën e ish-Presidentit Jair Bolsonaro për t’u liruar nga burgu për t’iu nënshtruar një ndërhyrjeje kirurgjikale ditën e Krishtlindjeve.

“Drita jeshile” u dha nga gjyqtari Alexandre de Moraes, i cili kryesoi gjyqin e Bolsonaros për një përpjekje për grusht shteti shtatorin e kaluar. Ish-presidenti u dënua me 27 vjet burg. Kërkesa u miratua pasi policia federale hetoi rastin dhe e konsideroi ndërhyrjen kirurgjikale “të justifikuar”.

Bolsonaro, 70 vjeç, ka vuajtur dënimin e tij në njësinë e policisë federale në Brasilia që nga fundi i nëntorit. Ai do të lirohet për herë të parë nesër dhe do t’i nënshtrohet një ndërhyrjeje kirurgjikale për një hernie inguinale në klinikën private DF Star të enjten.

Bolsonaro ka qenë në gjendje të dobët shëndetësore që nga një sulm me thikë në vitin 2018 gjatë fushatës së tij zgjedhore.

Nuk është e qartë se sa kohë do të qëndrojë në spital.

Gjykatësi Moraes kërkoi që policia ta transportonte atë “diskretisht”, duke theksuar se ai do të duhej të hynte në klinikë “përmes garazhit”.

Në prill, Bolsonaro iu nënshtrua një tjetër ndërhyrjeje të rëndë kirurgjikale në klinikën DF Star, ku dhjetëra mbështetës të tij u mblodhën jashtë spitalit.

Gjykatësi gjithashtu lejoi që gruaja e tij, Michelle Bolsonaro, ta shoqëronte gjatë gjithë kohës së shtrimit në spital.

Ish-presidenti ishte planifikuar të jepte një intervistë për faqen e internetit Metropoles sot, e para që nga burgosja e tij, por e anuloi atë në minutën e fundit “për arsye shëndetësore”.

Të premten e kaluar, gjykatësi Moraes hodhi poshtë një apel të ri nga avokatët e Bolsonaros, të cilët kërkonin që ai të lejohej të vuante dënimin e tij në arrest shtëpiak. Në vend të kësaj, ai miratoi një kërkesë të ngjashme nga Gjenerali Augusto Elena Ribeiro, i cili ishte dënuar në të njëjtën çështje. Gjenerali u lirua të hënën në mbrëmje dhe do të mbetet në arrest shtëpiak, duke mbajtur një byzylyk elektronik.