Departamenti Amerikan i Shtetit ka njoftuar se do t’u mohojë vizat pesë personave, përfshirë ish-komisionerin e Bashkimit Evropian Thierry Breton, duke i akuzuar se kanë tentuar të “detyrojnë” platformat amerikane të mediave sociale të shtypin pikëpamje me të cilat nuk pajtohen.
Sekretari i Shtetit, Marco Rubio, deklaroi se këta individë dhe organizata joqeveritare kanë promovuar masa censurimi nga shtete të huaja, të cilat sipas tij synojnë drejtpërdrejt folësit dhe kompanitë amerikane. Ai e cilësoi këtë si shkelje të sovranitetit amerikan.
Breton, i përshkruar nga Departamenti i Shtetit si “arkitekti” i Aktit të Shërbimeve Dixhitale (DSA) të BE-së, reagoi duke e quajtur vendimin një “gjueti shtrigash”. DSA-ja u kërkon platformave të mëdha të mediave sociale të zbatojnë rregulla të rrepta për moderimin e përmbajtjes, çka ka shkaktuar kritika nga konservatorët amerikanë, të cilët e shohin ligjin si mjet censurimi ndaj opinionit të djathtë. BE-ja i mohon këto akuza.
Breton ka pasur përplasje të hapura me Elon Musk, pronarin e platformës X, lidhur me zbatimin e rregullave të BE-së. Së fundmi, Komisioni Evropian gjobiti “X” me 120 milionë euro, duke argumentuar se sistemi i shenjave blu ishte mashtrues, pasi nuk siguronte verifikim domethënës të përdoruesve.
Në listën e personave të prekur nga ndalimi i vizave përfshihen gjithashtu Clare Melford nga Indeksi Global i Dezinformimit (GDI), Imran Ahmed nga Qendra për Kundërshtimin e Urrejtjes Dixhitale (CCDH), si dhe dy drejtues të organizatës gjermane HateAid. Zyrtarë amerikanë i akuzuan këto organizata se përdorin fonde për të nxitur censurën dhe për të futur në “lista të zeza” media dhe zëra amerikanë.
Nga ana tjetër, organizatat e përfshira e dënuan vendimin, duke e quajtur një akt autoritar dhe një sulm ndaj lirisë së shprehjes. Ata akuzuan administratën Trump se po përdor pushtetin shtetëror për të frikësuar dhe heshtur kritikët.
Rubio theksoi se kufizimet e vizave janë pjesë e politikës “Amerika e Para” dhe synojnë të ndalojnë atë që ai e quajti “kompleksi global i censurës industriale” nga ndërhyrja në fjalën e lirë amerikane.
