Forcat ruse kanë sulmuar gjatë natës qytetin e Zaporizhzhias, duke plagosur dy persona dhe duke shkaktuar dëme materiale, raportojnë autoritetet lokale.

Kreu i Administratës Ushtarake Rajonale, Ivan Fedorov, bëri të ditur se para sulmeve kishte paralajmërime për përdorimin e mundshëm të bombave ajrore të drejtuara. Sipas tij, sulmi goditi një nga rrethet e qytetit.

“Raportet paraprake tregojnë se një ndërtesë banimi është dëmtuar”, shkroi Fedorov, duke shtuar se të paktën tre goditje armike u regjistruan në qendrën rajonale.

Shërbimet e emergjencës ndërhynë menjëherë në vendet e goditura, ndërsa vlerësimi i plotë i dëmeve vijon. Më vonë, Fedorov njoftoi se sulmet shkaktuan zjarre në garazhe dhe automjete.

Fillimisht autoritetet raportuan se nuk kishte viktima, por më pas u konfirmua se dy persona, një burrë dhe një grua, janë plagosur dhe po marrin ndihmën e nevojshme mjekësore.

Fedorov publikoi gjithashtu pamjet e para nga vendngjarja, ku shihen dëmtime në ndërtesa dhe automjete të përfshira nga flakët si pasojë e sulmit.