Forcat ruse po përdorin gjithnjë e më shumë pozicionet e tyre në Bjellorusi për të nisur sulme ndaj Ukrainës, tha të premten presidenti ukrainas Volodymyr Zelensky pas një takimi me stafin e tij ushtarak. Zelensky nënvizoi se këto sulme përfshijnë përdorimin e dronëve dhe raketave, duke u përpjekur të anashkalojnë mbrojtjen ukrainase. “Kjo është e rrezikshme për Bjellorusinë,” shkroi ai në një postim në Facebook. “Është turp që Bjellorusia po dorëzon sovranitetin e saj në dobi të ambicieve agresive ruse.”

Presidenti ukrainas paralajmëroi gjithashtu për rreziqet e opsionit të sulmeve parandaluese në Bjellorusi, duke pretenduar se forcat ruse kanë instaluar pajisje në komplekset rezidenciale, përfshirë antena dhe sisteme udhëzimi për sulme ndaj Ukrainës në çatitë e ndërtesave pesëkatëshe.

“Kjo është një shpërfillje absolute për jetën njerëzore, Minsk duhet të ndalojë së luajturi lojëra të tilla,” theksoi Zelensky, duke shtuar se mbrojtja ajrore e Ukrainës është urdhëruar të përshtasë strategjinë e saj.

Në fillim të pushtimit rus të Ukrainës në shkurt 2022, trupat e Moskës përdorën territorin bjellorus si bazë për përparimin e tyre të dështuar drejt Kievit. Trupat bjelloruse nuk morën pjesë aktive në luftime, por kërcënimi i vazhdueshëm ka detyruar Ukrainën të mbajë një forcë të madhe përgjatë kufirit me Bjellorusinë.