Presidenti ukrainas, Volodymyr Zelensky, zhvilloi një videotelefonatë me krerët e shteteve dhe qeverive evropiane, një ditë para takimit të tij të planifikuar me ish-presidentin amerikan Donald Trump. Mediat e huaja raportojnë se në bisedë mori pjesë edhe Sekretari i Përgjithshëm i NATO-s, Mark Rutte.
Qeveria gjermane njoftoi se 11 krerët evropianë dhe Kanadaja siguruan Ukrainën për mbështetjen e tyre të plotë, duke theksuar rëndësinë e bashkëpunimit të ngushtë me Shtetet e Bashkuara për një paqe të qëndrueshme dhe të drejtë në Ukrainë.
Presidentja e Komisionit Evropian, Ursula von der Leyen, u shpreh se mirëpresin “të gjitha përpjekjet që çojnë drejt qëllimit tonë të përbashkët: një paqe e drejtë dhe e qëndrueshme që ruan sovranitetin dhe integritetin territorial të Ukrainës”. Ajo shtoi se gjatë vitit 2026, Komisioni i BE-së do të ushtrojë presion mbi Kremlinin, do të mbështesë Kievin dhe do të punojë për ta udhëhequr atë në rrugën drejt pranimit në BE.
Edhe Antonio Costa, Presidenti i Këshillit Evropian, përmes rrjeteve sociale ritheksoi mbështetjen e BE-së për Ukrainën. “Një Ukrainë e fortë dhe e begatë në BE është themeli i sigurisë. Ne punojmë për një paqe të fortë dhe të qëndrueshme për Ukrainën, në bashkëpunim me partnerët tanë amerikanë. Mbështetja e BE-së nuk do të zbehet – në luftë, në paqe, në rindërtim”, deklaroi ai.
Costa rikujtoi gjithashtu vendimet e fundit evropiane, duke përfshirë financimin për nevojat e Ukrainës për dy vitet e ardhshme me një kredi të përbashkët prej 90 miliardë eurosh, imobilizimin e aseteve sovrane ruse dhe zgjatjen e sanksioneve kundër Rusisë, me mundësi masash të mëtejshme nëse do të nevojiten.
Më herët, Zelensky u takua në Kanada me kryeministrin Mark Carney dhe pritet të udhëtojë drejt Floridas në SHBA për takimin me Donald Trump.
