Aksidenti tragjik në Durrës, në pranga 26-vjeçari. Policia: Drejtonte automjetin në gjendje të dehur dhe humbi kontrollin

Policia e Durrësit ka dhënë detaje lidhur me aksident tragjik të ndodhur një natë më parë në “Urën e Dajlanit” në Durrës, ku humbi jetën 18-vjeçarja.

Në njoftimin zyrtar policia sqaron se është arrestuar shoferi 26-vjeçar drejtonte automjetin në gjendje të dehur, ka humbur kontrollin dhe më pas është përplasur me barrierat anësore duke rënë nga ura.

Njoftimi i plotë:

Në vijim të informacionit të dhënë mbrëmë, mbi aksidentin rrugor te ura e Dajlanit, me pasojë vdekjen e shtetases V. G., informojmë se shërbimet e Policisë Rrugore kryen menjëherë veprimet hetimore të nevojshme, me qëllim zbardhjen e rrethanave të aksidentit. Në përfundim të këtyre veprimeve, u bë arrestimi në flagrancë i drejtuesit të automjetit në të cilin ishte pasagjere shtetasja V. G., shtetasit A. Xh., 26 vjeç, për veprat penale “Shkelja e rregullave të qarkullimit rrugor”, me pasojë vdekjen, dhe “Drejtimi i automjeteve në mënyrë të parregullt”.

Nga hetimet rezultoi se 26-vjeçari ka humbur kontrollin mbi automjetin që drejtonte në gjendje të dehur, dhe si pasojë, automjeti është përplasur me barrierat anësore të urës dhe ka rënë nga ajo.

26-vjeçari vijon të jetë në kujdesin e mjekëve, aktualisht jashtë rrezikut për jetën, ndërsa 2 këmbësorët e dëmtuar kanë marrë asistencën mjekësore të nevojshme dhe janë larguar në banesa.