Shtetet e Bashkuara sigurojnë sigurinë e Groenlandës dhe për këtë arsye duhet të kenë të drejta mbi burimet natyrore të ishullit, deklaroi zëvendëspresidenti i SHBA-së JD Vance.

“Ne duam të ndajmë pasurinë e kësaj mase të bukur tokësore me shumë minerale dhe shumë burime që në thelb po i mbrojmë”, tha ai në një intervistë me kanalin televiziv Newsmax .

Sipas Vance, nuk është Danimarka, por “fuqia e Shteteve të Bashkuara të Amerikës” që siguron sigurinë për ishullin.

“Nëse pyet veten se çfarë ndodh nëse, Zoti na ruajt, ndonjë vend i huaj lëshon një raketë balistike ndërkontinentale [ICBM] drejt Shteteve të Bashkuara të Amerikës, i gjithë sistemi ynë i mbrojtjes nga raketat mund të destabilizohet nëse nuk e kontrolloni Arktikun”, deklaroi ai.

Vance shtoi se Presidenti i SHBA-së, Donald Trump, po punon mbi detajet e një marrëveshjeje për Grenlandën.