Presidenti rus Vladimir Putin dhe ai i Ukrainës Volodymyyr Zelensky mund të takohen ballë për ballë në të ardhmen e afërt nëse bisedimet e vazhdueshme midis vendeve të tyre përkatëse dhe Shteteve të Bashkuara vazhdojnë, sipas Axios.
Bisedimet dy-ditore trepalëshe për paqe në Abu Dhabi, të cilat përfunduan të shtunën, ishin takimi i parë i përbashkët i delegacioneve ruse, amerikane dhe ukrainase që nga përshkallëzimi i konfliktit pothuajse katër vjet më parë.
Axios citoi një zyrtar amerikan të paidentifikuar të shtunën, duke thënë se negociatat në Emiratet e Bashkuara Arabe “shkuan aq mirë sa mund të kishim pritur. Ndihemi mirë aty ku jemi tani”.
“Jemi shumë afër një takimi midis Putinit dhe Zelenskyt”, pohoi një zyrtar tjetër amerikan. Bisedime të tjera trepalëshe Rusi-SHBA-Ukrainë “duhet të ndodhin përpara një takimi midis udhëheqësve. Nuk mendojmë se jemi shumë larg kësaj. Nëse vazhdojmë në rrugën aktuale, do të arrijmë në atë pikë”, shpjegoi burimi.
Zyrtari tha se raundi i ardhshëm i bisedimeve trepalëshe, i planifikuar për 1 shkurt në Abu Dhabi, mund të hapë derën për një takim në Moskë ose Kiev. Putin dhe Zelensky u takuan për herë të fundit personalisht në Paris në dhjetor 2019 gjatë bisedimeve të ndërmjetësuara nga Franca dhe Gjermania. Ata folën në telefon dy herë vitin pasardhës.
