Shtetet e Bashkuara besojnë se çarmatimi nga luftëtarët e Hamasit në Gaza vjen së bashku me një lloj amnistie për grupin palestinez, tha një zyrtar amerikan të hënën.

Zyrtari, duke folur me gazetarët në kushte anonimiteti, foli për të shënuar kthimin e eshtrave të pengut të fundit izraelit të mbajtur nga Hamasi. Izraeli dhe Shtetet e Bashkuara po i bëjnë presion Hamasit që të çarmatoset si pjesë e një plani në të cilin Gaza do të rindërtohet.

Zyrtari tha se zyrtarët amerikanë kanë besim se Hamasi do të çarmatoset.

“Po dëgjojmë shumë nga njerëzit e tyre duke folur për çarmatosjen. Mendojmë se do ta bëjnë këtë. Nëse nuk çarmatosen, atëherë e kanë shkelur marrëveshjen. Mendojmë se çarmatosja vjen së bashku me një lloj amnistie dhe sinqerisht mendojmë se kemi një program shumë, shumë të mirë për çarmatosjen”, tha zyrtari.

Ambasada izraelite në Uashington nuk iu përgjigj menjëherë një pyetjeje nëse Izraeli do të pranonte amnisti për anëtarët e Hamasit nëse ata dorëzojnë armët e tyre.

Sipas planit 20-pikësh të Presidentit Donald Trump për Gazën, pasi të kthehen të gjithë pengjet, anëtarët e Hamasit që angazhohen për bashkëjetesë paqësore dhe për çmontimin e armëve të tyre do të amnistohen. Anëtarëve të Hamasit që dëshirojnë të largohen nga Gaza do t’u sigurohet kalim i sigurt për në vendet pritëse, sipas planit.

Ushtria izraelite tha të hënën se eshtrat e pengut të fundit të mbajtur në Gaza , oficerit të policisë Ran Gvili, i cili u mbajt peng për më shumë se 840 ditë, janë identifikuar dhe do të kthehen për varrim.