Të paktën pesë persona kanë humbur jetën ndërsa stuhia Christine përfshiu Portugalinë qendrore dhe veriore, duke shkaktuar përmbytje, rrëshqitje toke dhe dëme të mëdha. Stuhia, të cilën qeveria e përshkroi si një “ngjarje ekstreme”, mbylli shkolla dhe dëmtoi ndërtesa.
Portugalia është goditur nga një sërë stuhish ditët e fundit, përfshirë një gjatë fundjavës në të cilën një burrë vdiq pasi makina e tij u rrëmbye nga përmbytjet. Sipas autoriteteve të mbrojtjes civile kishte shira të rrëmbyeshëm dhe erëra me shpejtësi deri në 150 km/orë.
Erërat më të forta u regjistruan në bazën ajrore Monte Real në Leiria, ku u regjistruan erëra me shpejtësi 178 kilometra përpara se pajisjet e monitorimit të dëmtoheshin. Zyrtarët thanë se vendi ka të ngjarë të jetë pika e hyrjes së stuhisë në Portugalinë kontinentale.
Më shumë se 850,000 njerëz mbetën pa energji të mërkurën, sipas shpërndarësit të energjisë elektrike E-Redes. Agjencia e mbrojtjes civile (ANEPC) tha se tre persona kishin vdekur në rajonin qendror të Leirias – një nga zonat më të goditura.
Transporti në të gjithë Portugalinë ka pasur probleme serioze, me rrugë – përfshirë autostradën kryesore që lidh Lisbonën me veriun – dhe hekurudhat e bllokuara nga mbeturinat.
Dhjetë zona bregdetare u vunë në alarm të kuq për mot të mërkurën për shkak të kushteve të rrezikshme të detit, me valë që parashikohen të arrijnë 14 metra, sipas Institutit Portugez të Detit dhe Atmosferës (IPMA).
Policia e Sigurisë Publike (PSP) u bëri thirrje banorëve të Coimbra dhe Leiria të qëndrojnë në shtëpi, ndërsa Ministri i Mbrojtjes Civile i Portugalisë tha se vendi mbetet në gatishmëri të lartë. Kryeministri Luís Montenegro shprehu ngushëllimet e tij familjeve të viktimave. Ai tha se autoritetet po vlerësonin dëmet dhe do të merrnin “çdo masë të nevojshme”.
