Deputeti i Partisë Demokratike, Klevis Balliu, ka njoftuar përmes një postimi në Facebook se ka takuar kongresmenin amerikan Pete Sessions, ku kanë diskutuar mbi çështje të rëndësishme për situatën politike dhe të drejtën në Shqipëri.

Sipas Balliut, temë kryesore e takimit ishte kapja e drejtësisë nga qeveria, e cila, sipas tij, përdoret si armë për të goditur kundërshtarët politikë. Gjithashtu, u diskutuan problemet serioze të demokracisë në vend, përfshirë përdorimin e kartelave të drogës në proceset elektorale.

Deputeti theksoi rëndësinë e këtyre takimeve për të informuar miqtë ndërkombëtarë mbi situatën në Shqipëri dhe për të kërkuar mbështetje në forcimin e transparencës dhe sundimit të ligjit.