Një tjetër aeroplanmbajtëse USS Gerald R. Ford, së bashku me anijet shoqëruese, po dërgohet nga SHBA-të në Lindjen e Mesme.
Sipas CBS, “Ford” që është aeroplanmbajtësja më e përparuar në Marinën Amerikane, u nis nga Karaibet në një mision drejt Lindjes së Mesme, ku ndodhet tashmë USS Abraham Lincoln.
USS Ford ka qenë në Karaibe që nga nëntori i kaluar, si pjesë e operacionit ushtarak amerikan në Venezuelë me sulme ndaj anijeve që dyshohet se transportonin drogë.
Lëvizja e aeroplanmbajtëses së dytë vjen në një kohë kur Presidenti i SHBA-së Donald Trump po i bën presion Iranit që të përfundojë një marrëveshje bërthamore duke kërcënuar me veprime ushtarake nëse nuk pranon të kufizojë programin e tij bërthamor.
Trump ka paralajmëruar vazhdimisht në javët e fundit se një “armadë e madhe” është në rrugën e saj drejt Iranit, ndërsa në një intervistë me NBC News javën e kaluar ai tha se udhëheqësi suprem i Iranit, Ajatollah Ali Khamenei, “duhet të jetë shumë i shqetësuar”.
