Historia e Jani Aliaj e lidhur me krimin dhe burgjet është e lidhur pashmangshmërisht me njëra-tjetrën, pasi e mbylli jetën e tij pikërisht aty ku nisi edhe përplasjet e para të mëdha në botën e krimit.
Ashtu siç ishte edhe përplasja që kishte krijuar fillimisht në një burg në Athinë me Elton Çiçon të cilin vite më pas do ta qëllonte për vdekje në një lokal në zonën e ish-bllokut në Tiranë.
Konflikt midis të dyve që kishte nisur gjatë kohës që ata po vuanin dënimin në të njëjtin burg në Athinë.
Emisioni “Në Shënjestër” në Neës24, me autore Klodiana Lalën, duke iu referuar dosjes hetimore për vrasjen e Jani Aliajt, solli përmes një dokumentari historinë e 49-vjeçarit dhe konfliktin e tij me Elton Çiçon.
Dosja Hetimore
Nga të dhënat hetimore rezulton se viktima Elton Çiço dhe autori Jani Aliaj kanë pasur midis tyre një konflikt të mëparshëm, ku ky i fundit ishte shprehur vazhdimisht se do ta vriste atë me çdo kusht.
Ky konflikt midis tyre ka filluar gjatë kohës që si viktima ashtu dhe autori kanë qenë duke vuajtur dënimin për vepra të ndryshme penale në një burg në Athinë. Ku gjatë kohës së qëndrimit në Greqi, Jani Aliaj ka qëlluar me mjet prerës, të tipit thikë, djalin e shtetasit Sh. B, me banim në një fshat të Tepelenës, i cili më pas si pasojë e këtyre goditjeve ka ndërruar jetë.
Do të ishte pikërisht kjo ngjarje e cila do të ishte prelud edhe i përplasjes gjakësore midis Elton Çiços dhe Jani Aliaj.
Të cilët fillimisht zgjodhën të lanin hesapet me njëri-tjetrin në burg, duke përdorur thikat.
Përleshje e cila përfundoi me plagosjen e rëndë të Elton Çiços.
Që nga ana e tij nuk ia fali kurrë Jani Aliajt, plagët që i shkaktoi.
Dosja Hetimore
Gjate kohës që Jani Aliaj po vuante dënimin me burgim për vrasjen që kishte kryer ai u përplas dhe qëlloi me thikë Elton Çiçon, duke e lënë të plagosur rëndë. Kjo pasi ky i fundit po nga një fshat i Tepelenës kishte planifikuar të kryente vrasjen e Jani Aliaj, në shenjë hakmarrje për vrasjen e djalit të Sh.B.
Por mesa duket thika ajo që i mori edhe jetën më vonë në burg, ishte arma më e preferuar e Jani Aliajt, në fillimet e karrierës së tij kriminale.
Pasi me të plagosur rëndë Elton Çiçon, ai bëhet protagonist edhe i një tjetër sulmi në burg.
Këtë herë duke goditur me thikë A.B, që ishte lidhje e ngushtë shoqërore e Elton Çiços.
Dosja Hetimore
Po gjatë kësaj periudhe kohore, ndërsa Jani Aliaj po vuante dënimin në këtë burg, ai godet me sende të forta, A. B, bashkëatdhetarin e tij nga Berati, por që ishte nip në Memaliaj, ku rrinte me periudha të gjata kohore. A. B që ishte lidhje e ngushtë shoqërore e Elton Çiços.
Por me t’u arratisur nga burgu në Greqi, Jani Aliaj, që zgjedh të fshihet në Shqipëri, nuk i harron mëritë e vjetra me Elton Çiçon.
Ashtu si edhe ky i fundit.
Që edhe ky këtë kohë ishte kthyer në Shqipëri.
Inate që për t’u riaktivizuar në formën e tyre më të egër, shërben një atentat i dështuar në vitin 2016 ndaj Jani Aliaj.
Ku ai beson se autor i këtij atentati ishte Elton Çiço.
Atentat i parë ndaj Jani Aliaj që u krye në Rrugën e Kavajës në Tiranë.
Më datë 11 Janar 2016, rreth orës 18:30 minuta, në Tiranë, persona të paidentifikuar kanë qëlluar me armë zjarri ndaj Jani Aliaj. I cili si pasojë e këtyre të shtënave nuk është dëmtuar.
Por nga sa shikohet në vazhdim ky nuk do të ishte atentati i vetëm ndaj Jani Aliaj.
Pasi vetëm disa muaj më pas ai do të ishte shënjestër e një tjetër sulmi me armë. Këtë herë ndërsa ishte duke udhëtuar në aksin Tepelenë-Gjirokastër.
Ku edhe këtë herë fati ishte me të dhe personin që udhëtonte në makinë.
Jani Aliaj i cili thuhet se mori një plagë në krah.
Por që pas këtij atentati vendosi të lante përfundimisht duart me Elton Çiçon.
Duke u zhvendosur në Tiranë dhe përgatitur planin për ekzekutimin e Elton Çiços.
Dosja Hetimore
Më datë 24 Prill 2016, rreth orës 22:30 minuta, ne aksin rrugor kombëtar Tepelenë- Gjirokastër, gjatë kohës që po lëvizte si pasagjer në sediljen e pasme të një automjeti të drejtuar nga shtetasi S. M, është qëlluar disa herë me armë zjarri shtetasi Jani Aliaj, i cili ka marrë dëmtime të lehta në pjesën e krahut të majtë. Nga ku dyshohet se Jani Aliaj ka qenë dhe shënjestra e këtij atentati.
I marrë në pyetje drejtuesi i mjetit, S. M, pretendoi se atentati ndaj tyre ishte i planifikuar nga shtetasi Elton Çiço.
Një nga arsyet përse Jani Aliaj ishte i bindur se pas atentateve ndaj tij fshihej Elton Çiço ishte edhe informatat që ai dhe miku i tij Nelgert Pata, kishin se Çiço u kishte vendosur njerëz nga pas për t’i ruajtur.
Jani Aliaj që deri në fillim të viteve 2000, kishte qenë lidhje e afërt shoqërore e Elton Çiços, para se midis tyre të fillonte një përplasje që do të çonte deri në një mëri të thellë me njëri-tjetrin.
Armiqësia që lindi pasi në vitin 2000. Jani Aliaj qëlloi për vdekje me thikë E. Ballazhiun, nga fshati Zhabakin, i Tepelenës.
Ballazhiu atë kohë 20 vjeç, që kishte qenë shok fëmijërie me Elton Çiçon.
Dhe ishin rritur bashkë në Tepelenë.
Elton Çiço që i çoi fjalë Jani Aliaj që ndodhej në Greqi se nuk do ia falte vrasjen e mikut të tij.
Ndërsa fati e desh që të dy të takoheshin disa vite më pas në burgun e Koridhalos.
Jani Aliaj, 23 vjeç, ndërsa ishte arrestuar për drogë, Ashtu si edhe Elton Çiço, po për trafik të lëndëve narkotike.
Që besohet se ka qenë edhe burimi i sherrit midis tyre, që vazhdoi deri në elemiminin e njëri-tjetrit.
Dosja Hetimore
Jani Aliaj ka pretenduar përgjatë gjithë kohës se autor i atentateve ndaj tij ishte Elton Çiço. Kjo pas konflikteve të ashpra që kishin, ku edhe kishin filluar të ruheshin ndaj njëri-tjetrit. Jani Aliaj që rezulton të jetë lidhje e afërt e të ndjerit Nelgert Papa, i cili kishte pasur njohje të mëparshme me Elton Çiçon. Neigert Papa dhe Elton Çiço që kohët e fundit kishin prishur marrëdhënien midis tyre.
Kjo pasi Papa kishte mësuar që Elton Çiço kishte vendosur persona që të ruanin dhe kontrollonin lëvizjet e tij, çka ka çuar në mendimin e tij se ky i fundit po planifikonte ekzekutimin e tij.
Sipas dosjes hetimore personi që u ishte vënë nga pas Jani Aliajt dhe mikut të tij Nelgert Pata, ishte O.K i cili pas kërcënimeve që kishte marrë nga Jani Aliaj dhe miku i tij, kishte pranuar që ishte paguar nga Elton Çico për t’i ndjekur nga pas.
O.K, i cili menjëherë pas vrasjes së Elton Çiços, rezulton se ishte larguar nga Shqipëria më datë 2 Maj 2016, vetëm pak orë pasi kishte ndodhur vrasja e Elton Çiços.
Duke mos qëndruar as për t’i dhënë lamtumirën e fundit mikut të tij.
Duke zgjedhur të mos kthehet më në Shqipëri.
Nelgert Pata, i cili do të ekzekutohej në qytetin e Fierit, vetëm disa muaj pas vrasjes së Elton Çiços.
Ndërkohë që më herët, më 21 Gusht 2016, i kishte mbijetuar një atentati Tiranë.
Ngjarje kjo e ndodhur te ish-Parku i Autobusëve, ku dhe mbeti i plagosur.
Pata që kishte qenë një emër i njohur për drejtësinë.
Pasi në vitin 2008 së bashku më babain e tij Astrit Pata, ishin gjykuar për shfrytëzim prostitucioni, pas denoncimit të bërë nga shtetasja Silvana K.
E cila ishte rrëfyer se në vitin 2004 ajo ishte njohur fillimisht me Astrit Patën në lokalin e të vëllait të tij në Tepelenë, ku vajza punonte si kameriere.
Më pas babai i Nelgert Patës i kishte kërkuar të shkonin së bashku për pushime në Greqi.
Nga ku më tej, Silvana K, tregoi se Astrit Pata e kishte dërguar me dokumente false në Norvegji.
Aty ku e kishte pritur djali i tij, Nelgerti, që në atë kohë sapo kishte mbushur 20 vjeç.
I cili e kishte detyruar të prostituonte.
Silvana K. që kishte mundur të shpëtonte nga tutorët dhe të bënte denoncim.
Çka çoi pas letërporosisë së ardhur nga Norvegjia, në arrestimin e at dhe bir, në prill të vitit 2006.
Gjykata e Apelit për Krime të Rënda që dënoi më 13 korrik të vitit 2009 me 15 vjet dhe 7 milionë lekë gjobë, Astrit Patën.
Ndërsa të birin Nelgert Pata me 16 vjet dhe 6 milionë lekë gjobë.
Përplasjen e vjetër midis Jani Aliaj dhe Elton Çicos e pranoi në rrëfimin e tij përpara grupit hetues edhe Renato Milloshi.
Njohje e vjetër shoqërore me Jani Aliaj, që nga fëmijëria e tyre, e kaluar në Tepelenë.
Personi, që kishte në pronësi makinën që Jani Aliaj, përdori për t’u afruar dhe më pas larguar nga skena e krimit.
“Unë Jani Aliajn e njoh që nga viti 1989, kur qëndroja te gjyshja ime në Tepelenë. Në vitin 1999 unë ika në emigrim dhe u ktheva në vitin 2005. Gjatë kësaj kohe mësova që Jani Aliaj ndodhej në burg në Greqi, për një vrasje, ku ishte dënuar me 10 vite.
Në korrik të vitit 2015 unë e takova rastësisht në Sarandë, ku unë isha me pushime me familjen. Jani më ftoi ndërkohë që ta kaloja pjesën tjetër të pushimeve në Borsh në hotelin e tij.
Ku unë qëndrova një javë dhe Jani pagoi tarifën. Kështu ne mbajtëm kontakte të vazhdueshme. Më pas Jani erdhi me qira bashkë me të dashurën e tij në Tiranë”, është shprehur Renato Milloshi.
Këtu ai njihte vetëm mua dhe Neigert Papën. Ai kërkonte të regjistronte një makinë që sapo e kishte blerë.
Por duke qenë se nuk e regjistronte dot me emrin e tij, pasi ishte me vendbanim në Tepelenë, më kërkoi që këtë makinë ta regjistronte me emrin tim. Gjatë kësaj kohe, Jani më tha se i ishin bërë dy atentate.
Një në rrugën e Kavajës nga një djalë i ri që qëlloi vetëm një herë dhe një në Gjirokastër, ku kishte bindjen se porositësi ishte Elton Çiço. Me të cilin Jani më tha se ishin përplasur me thika përpara disa vitesh.
Edhe pse pranoi që makina me të cilën Jani Aliaj pas vrasjes së Elton Çiços ishte e regjistruar në emrin e tij, Renato Milloshi, mohoi që ai të kishte dijeni për krimin që do të kryhej.
Edhe pse pranoi që disa herë Jani Aliaj i ishte shprehur se do ta vriste Elton Çiçon, ashtu siç edhe ndodhi në të vërtetë, mbrëmjen e datës 1 Maj 2016, në ish-Bllok.
“Pasi u bë regjistrimi i mjetit në emrin tim, unë Janin e takova edhe njëherë më datë 29 Prill 2016. Më datë 1 Maj 2016, unë isha në banesë kur në lajme pashë që ishte vrarë Elton Çiço.
Pas rreth 15 minutash unë u përpoqa të telefonoja Janin por telefoni i tij dilte i fikur. Po kështu i telefonova Neigert Patës por edhe telefoni i tij ishte i fikur.
Gjatë kësaj kohe isha në ankth pasi automjeti i përdorur në krim ishte në emrin tim.
Në lidhje me vrasjen jam i sigurtë që krimi u krye nga Jani, pasi e njoha nga konstrukti i trupit, mënyra e ecjes si dhe fakti që ai vetë më pati thënë kur ishte kthyer nga Gjirokastra se do ta vriste Eltonin. përpara se ai të vriste Janin.
Ajo që më pas e zbuloi autorin dhe makinën që u përdor në krim, ishin lëvizjet që Jani Aliaj dhe personat që e ndihmuan, kryen natën para dhe pas krimit. Si edhe rrobat që atij iu gjetën në banesën e marrë me qira, që ishin identike me ato që shfaqet në pamjet filmike, personi që qëlloi ndaj Elton Çiços”, tha Renato Milloshi para hetuesve.
Jani Aliaj që u kthye një ditë më pas të dëmtonte një nga kamerat që kishte regjistruar lëvizjet e tij, por që ishte tepër vonë, pasi tashmë pamjet filmike ishin në dorë të policisë.
Dosja Hetimore
Nga kqyrja e pamjeve filmike rezulton se më datë 1 Maj 2016, në orën 22:10 min një person me kapele në kokë kthen kokën nga brendësia e tunelit, dhe në këtë moment kohor ky person, i identifikuar më pas si Jani Aliaj, lëviz në drejtim të kundërt me rrugën dhe rikthehet përsëri pas pak momentesh duke tentuar të hyjë në brendësi të këtij tuneli, ku është e montuar dhe kamera.
Person që ka karakteristika të njëjta me atë që ka hyrë në ambientet e lokalit, ku dhe ka kryer vrasjen e viktimës Elton Çiço.
Po kështu nga kqyrja e kamerave të sigurisë dhe veshjet e gjetura në banesën ku Jani Aliaj ka banuar me qira, si dhe atletet sportive që ai mbante veshur, ka rezultuar se ato korrespondojnë me veshjet që ai ka pasur në vendin e ngjarjes, në momentin e vrasjes së Elton Çiços.
