Interi po zhvillon një kampionat më vete. Shifrat flasin qartë: përveç humbjeve ndaj Udinese dhe Juventusit në fazën e parë, zikaltërit nuk kanë lëshuar asnjë pikë kundër skuadrave jashtë tre vendeve të para. Një ritëm i frikshëm, me 21 fitore në 21 ndeshje kundër ekipeve nga Roma e poshtë në renditje – diferenca në krye është krijuar pikërisht aty.

Milani, nga ana tjetër, paguan pikërisht ndeshjet me skuadrat e gjysmës së dytë të tabelës. Humbja ndaj Parmës – e para pas 24 rezultateve pozitive radhazi – theksoi një problem të qartë: 16 nga 24 pikët e humbura këtë sezon kanë ardhur kundër kundërshtarëve të “vegjel”. Një hendek që sot peshon rëndë në garë.

Tashmë, me titullin praktikisht të arkivuar, objektivi i kuqezinjve është i qartë: zona Champions. Por kalendari nuk fal – Inter, Lazio në transfertë, Napoli në “Maradona” dhe Juventus në horizont – një seri sfidash që do të përcaktojë ambiciet reale të sezonit.

Paradoksalisht, Milani duket më bindës kur përballet me skuadra të mëdha. Megjithatë, problemet mbeten: mungesë konkretizimi në 30 metrat e fundit, pasiguri në mbrojtje dhe ritëm i ngadaltë në ndërtim. Mungesa e një qendërsulmuesi tipik e bën sulmin më pak të rrezikshëm dhe më të parashikueshëm.

Gara për vendet e para është më e hapur se kurrë. Roma, Atalanta dhe të tjerat afrohen, ndërsa Napoli dhe Juventusi pritet të rikthehen në nivelin e tyre. Në lojë nuk ka vetëm prestigj, por edhe milionat e Champions League. Dhe këtë luks, askush nuk mund ta humbasë.