Kreu i Partisë Mundësia, Agron Shehaj ka deklaruar se PS e ka vendosur që nuk do të heqë imunitetin e zëvendës kryeministres Belinda Balluku, të cilën sipas tij po e mbron prej dy muajsh.
I ftuar në studion e News 24, Shehaj u shpreh se nesër së bashku me deputetin Erald Kapri do të dorëzojnë në Gjykatën Kushtetuese një kërkesë që GJK të shprehet në lidhje me faktin që dosja e Ballukut e dorëzuar në Kuvend nga SPAK, po mbahet sekret dhe deputetët nuk po lejohen të informohen mbi detajet e hetimit, edhe pse duhet të votojnë në lidhje me heqjen e imunitetit të zv.kryeministres.
“SPAK ka kërkuar arrestimin e Ballukut.
Ka një tentativë për të mbrojtur Ballukun, fillimisht me pezullimin tani me imunitetit. PS e ka bërë të qartë që nuk ka ndërmend të lejojë arrestimin, dhe kjo pritej sepse do të ishte një problem i madh për Ramën. Nuk dimë ç’mund të bëjë ajo pas arrestimit, e quante veten të paprekshme që mendonte se kurrë nuk do të hetohej apo merrej e pa ndehur.
PS ka dy muaj që e mbron Ballukun, e mbrojti me kërkesën e GJK, e bën çdo ditë me sulmet ndaj drejtësisë, e bën edhe kur nuk bëhen publike të dhënat në dosjen e Ballukut kur deputetët duhet të vihen ne dijeni pasi jemi ne që duhet të votojmë për imunitetin e saj.
Nesër së bashku me deputetin Kapri do të dorëzojmë në GJK një kërkesë që të shprehen në lidhje me këtë çështje.
Balluku del në dosje me përgjime që ndan tendera me bizneset, ku del edhe emri i Ramës”, tha ai.
