Kreu i PD, Sali Berisha ka reaguar në lidhje me gjuhën e përdorur nga kreut i grupit parlamentar të PS, Taulant Balla ndaj deputetes demokrate Albana Vokshi, kur gjatë debateve në Kuvend iu drejtua me fjalët: “Për ty kam vetëm numrin me 0900”.

Fjalorin e socialistit, Berisha e konsideroi si hakmarrje primitive për të cilën Balla meriton dënimin më të rëndë.

“Dënoj me forcën më të madhe dhunën ndaj aktivistëve dhe protestuesve paqësor para kryeministrisë të Lapajt dhe heqjen e çadrës së tyre. Ky është një akt, antiligjor, i turpshëm i një frikacaku që ka tolerancë zero ndaj kundërshtatëve. Sikundër dënoj, aktin kriminal dhe banditesk të Taulant Ballës në parlamentin shqiptar, me porosi të Edi Ramës, në një hakmarrje të verbër, primitive ndaj Albana Vokshit e cila ka qenë zë i fuqishëm në mbarë komunitetin ndërkombëtar ndaj narkoregjimit. Edi Rama urdhëroi Taon e tij për të përdorur një gjuhë prej stërodineri, një gjuhë me të cilën ai meriton ndëshkimin më të madh. Dënon gjithashtu përjashtimin pa asnjë motiv 20 ditë të deputetit Agron Shehaj nga parlamenti, si një verbëri e Edi Ramës, sepse të gjitha kryhen me urdhër të Edi Ramën, dhe si një përpjekje për të shuan çdo zë opozitar”, tha ai.