Turqia ka njoftuar vendosjen e një sistemi të mbrojtjes ajrore Patriot në provincën Malatya, ku ndodhet edhe baza e radarit Kürecik. Lajmi u bë i ditur sot nga Ministria Turke e Mbrojtjes Kombëtare, si pjesë e forcimit të mbrojtjes ajrore të NATO-s në rajon, në sfondin e zhvillimeve të fundit në Lindjen e Mesme.

Në një deklaratë zyrtare, ministria theksoi se Forcat e Armatosura Turke janë plotësisht të përkushtuara për të garantuar sigurinë e vendit dhe qytetarëve, ndërsa janë marrë masa shtesë për mbrojtjen e kufijve dhe të hapësirës ajrore.

“Në dritën e zhvillimeve të fundit në rajonin tonë, po merren masat e nevojshme për sigurinë e kufijve dhe hapësirës ajrore, ndërsa po zhvillohen edhe konsultime me NATO-n dhe aleatët tanë”, thuhet në deklaratë.

Sipas Ankarasë, vendosja e sistemit Patriot synon të forcojë mbrojtjen e hapësirës ajrore turke. Autoritetet theksojnë se, përveç masave kombëtare të ndërmarra nga Turqia, edhe NATO ka rritur kapacitetet e saj të mbrojtjes ajrore dhe raketore në rajon. “Në këtë kuadër, një sistem Patriot është vendosur në Malatya për të mbështetur mbrojtjen e hapësirës sonë ajrore”, njoftoi Ministria e Mbrojtjes.

Ankaraja bëri të ditur gjithashtu se po monitoron nga afër zhvillimet në rajon dhe po vazhdon koordinimin me aleatët e NATO-s, me synimin për të ruajtur stabilitetin dhe sigurinë rajonale. Në përfundim të deklaratës, ministria theksoi se Turqia do të vazhdojë të mbajë në nivel maksimal aftësitë e saj të mbrojtjes dhe sigurisë, duke ndjekur zhvillimet në bashkëpunim të ngushtë me NATO-n dhe partnerët e saj.