Toto Volf, CEO i Mercedesit, duket se nuk e humb rastin për të theksuar rikthimin e skuadrës së tij në majë. Pas ndryshimeve në rregulloren teknike të Formulës 1, Mercedesi ka rifituar formën dhe dominimin që kishte humbur që nga viti 2022.
Në të njëjtën kohë, Volf duket se i ka dërguar edhe një mesazh të qartë Maks Vershtapenit, të cilin e kishte joshur disa herë gjatë dy viteve të fundit për t’iu bashkuar Mercedesit. Piloti holandez, megjithatë, i refuzoi vazhdimisht këto oferta. I pyetur për fillimin e dobët të sezonit të katër herë kampionit të botës dhe për ankesat e tij ndaj makinave të reja të F1, Volf dha një përgjigje të drejtpërdrejtë. “Besoj se Vershtapen po përjeton një spektakël të tmerrshëm. Nëse shikon pamjet nga kamera në makinën e tij gjatë kualifikueseve, duket qartë se është një makinë e tmerrshme për t’u drejtuar dhe kjo ndihet”, tha austriaku, i cili nuk e fshehu buzëqeshjen. Megjithatë, sipas tij, situata nuk është e njëjtë për ekipet e tjera.
“Nga pikëpamja e spektaklit, ajo që pamë në Kinë mes Ferrarit dhe Mercedesit ishte një garë e mirë, me shumë parakalime. Të gjithë kemi qenë pjesë e Formulës 1 në periudha kur nuk kishte fare parakalime, dhe ndonjëherë bëhemi shumë nostalgjikë për të kaluarën”, tha Volf, duke iu referuar deklaratave të Vershtapenit, i cili kishte thënë se “kush e pëlqen këtë Formula 1, në të vërtetë nuk i pëlqejnë garat”.
Volf, i cili aktualisht është në kulmin e formës me dominimin e Mercedesit në sesionet e kualifikimit dhe në Sprint, përpiqet të theksojë anët pozitive të situatës së re.
“Mendoj se spektakli është i mirë. Pamë gjithashtu gara shumë interesante në mes të renditjes. Kjo është diçka pozitive. Por nga këndvështrimi i pilotëve, kur bëhet fjalë për një xhiro kualifikuese me shpejtësi maksimale, situata ndryshon,” pranoi austriaku.
“Të heqësh këmbën nga gazi dhe ta lësh makinën të rrëshqasë nga inercia gjatë një xhiroje kualifikuese është diçka e vështirë për një pilot si Vershtapen, i cili gjithmonë sulmon. Por do të thoja se kjo është më shumë një problem specifik i makinës, që në një farë mënyre e zmadhon situatën. Nëse e shikon garën nga televizori, madje edhe Maksi do të thoshte se beteja në krye ishte interesante”, shtoi Volf, duke iu referuar problemeve të Red Bullit.
PSE NUK SHKOI TE MERCEDESI? – Rezultatet dhe klauzolat kontraktuale nuk e lejuan një lëvizje të tillë në vitin 2025, sezon në të cilin Vershtapen luftoi për titullin dhe humbi kampionatin e pestë për vetëm dy pikë. Kontrata e tij me Red Bullin skadon në vitin 2028. Megjithatë, këtë sezon mund të aktivizohen klauzolat e performancës, pasi është e mundur që në mes të sezonit ai të mos jetë mes tre pilotëve më të mirë në renditjen e kampionatit.
A ËSHTË ENDE OFERTA? – Me shumë gjasa jo. Me Xhorxh Rasëllin si lider të ekipit dhe talentin e ri Andrea Kimi Antoneli që po shihet si ylli në ngritje, Volf duket se e konsideron formacionin ideal të Mercedesit tashmë të kompletuar. Vetëm një përmbysje e madhe në kampionat, për shembull nëse Ferrari do t’ua rrëmbente titullin me Sharl Lëklerkun apo Luis Hamiltonin, mund ta ndryshonte këtë situatë. Përndryshe, dyert e Mercedesit mund të jenë tashmë të mbyllura për një ndryshim në formacionin e vitit 2027. Ndërkohë, edhe vetë Vershtapen ka lënë të kuptohet se problemi nuk lidhet vetëm me rezultatet. “Edhe nëse do të fitoja, do të thosha të njëjtën gjë për këto makina”, deklaroi piloti holandez.
