Policia turke ka arrestuar 162 persona të akuzuar për postimin e përmbajtjes kontraverse në internet në lidhje me dy të shtëna vdekjeprurëse në shkolla që ndodhën këtë javë.
Ata “u zbulua se ishin përfshirë në poste dhe aktivitete që lavdëronin krimin dhe kriminelët dhe ndikonin negativisht në rendin publik”, tha policia.
Të paktën 16 persona u plagosën në një të shtënë me armë në një shkollë të mesme në juglindje të vendit të martën, përpara se nëntë të tjerë të vriteshin në një të shtënë me armë në një shkollë tjetër në qytetin Kahramanmaras të mërkurën.
Tetë nxënës dhe një mësues u vranë në të shtënat në Kahramanmaras, thanë zyrtarët turq, ndërsa 13 të tjerë u plagosën, përfshirë gjashtë në gjendje kritike.
Një sulmues 14-vjeçar u vra gjithashtu gjatë incidentit, i cili ndodhi në shkollën e mesme Ayser Calik.
I dyshuari e kishte planifikuar sulmin paraprakisht, tha zyra e prokurorit lokal në një deklaratë.
“Gjatë ekzaminimit të materialeve dixhitale, në kompjuterin e të dyshuarit u gjet një dokument i datës 11 prill 2026, që tregonte se ai kishte ndërmend të kryente një operacion të madh në të ardhmen e afërt.”
I dyshuari i ishte referuar vrasësit amerikan Elliot Rodger në një foto në profilin e tij në WhatsApp, sipas policisë. Rodger vrau gjashtë persona përpara se t’i jepte fund jetës së tij në Kaliforni në vitin 2014.
Mediat turke raportuan se sulmuesi, që besohet të jetë një student, hyri në dy klasa dhe kishte me vete pesë armë dhe shtatë karikatorë.
