Kina dhe Rusia në deklaratat e tyre të përbashkët kanë denoncuar projektin e planifikuar të SHBA-së “Kupola e Artë” dhe perspektivën e lëshimit të armëve në hapësirë.

Kupola e Artë, e modeluar sipas Kupolës së famshme të Hekurt të Izraelit dhe fillimisht e quajtur Kupola e Hekurt e Amerikës është një sistem i planifikuar mbrojtës nga raketat me shumë shtresa që do të zbulonte dhe shkatërronte raketat balistike, hipersonike dhe ato të lundrimit të armikut.

Megjithatë, ndryshe nga Kupola e Hekurt e Izraelit, Kupola e Artë do të përfshinte të gjithë Tokën nëpërmjet një konstelacioni prej disa mijëra satelitësh në orbitë.

Një teknologji e tillë, thuhet në deklaratën e përbashkët, “përbën një kërcënim të qartë për stabilitetin strategjik”, shkruan BBC.

“Kjo rrit ndjeshëm rrezikun e konflikteve në hapësirë, kontribuon në militarizimin e hapësirës së jashtme dhe shndërrimin e saj në një vend të konfrontimit të armatosur, bie ndesh me parimet e përdorimit paqësor të hapësirës së jashtme… dhe çon në përkeqësimin e një situate tashmë të vështirë”, thuhet në deklaratë.