Numri i të vdekurve nga shembja e një rezervuari kimikatesh në një fabrikë letre në shtetin e Uashingtonit , SHBA, është rritur në tetë, ndërsa përpjekjet e shpëtimit vazhdojnë. Autoritetet thanë se gjashtë nga nëntë punëtorët që ishin të zhdukur janë gjetur të vdekur, ndërsa tre të tjerët janë ende të zhdukur dhe supozohet se kanë vdekur.

Aksidenti ndodhi të martën në objektin e Nippon Dynawave Packaging Co., kur një rezervuar me kapacitet prej rreth 900,000 gallonësh, i cili përmbante “lëngun e bardhë” kimik , u shemb pak pas orës 7:15 të mëngjesit sipas orës lokale.

Trupat e gjashtë punëtorëve që u nxorën u gjetën pranë një zone pushimi për stafin, sipas departamentit të zjarrfikësve. Shpëtuesit thanë se shembja ndodhi gjatë një ndërrimi turni, gjë që shpjegon pse shumë punëtorë ishin mbledhur në zonë.

Gjatë një konference për shtyp të mërkurën, Guvernatori i Shtetit të Uashingtonit, Bob Ferguson, e quajti incidentin “tragjedia më vdekjeprurëse industriale në historinë moderne të shtetit të Uashingtonit”.

Përveç të vdekurve, disa persona u plagosën, përfshirë një zjarrfikës. Të plagosurit u dërguan në spitalet e zonës për trajtim, ndërsa disa u dërguan në Qendrën e Djegieve në Oregonin.

Përpjekjet e rikuperimit u vonuan fillimisht për shkak të shqetësimeve serioze në lidhje me stabilitetin dhe integritetin strukturor të rezervuarit të dëmtuar.

Autoritetet thanë se rezervuari ishte më shumë se gjysmë i mbushur kur u shemb. Një inspektim zbuloi se afërsisht 25,000 gallonë kimikat kishin mbetur brenda.

Rezervuari u gjet gjithashtu i stabilizuar, duke u lejuar ekipeve të shpëtimit dhe rikuperimit të hartonin një plan për largimin e tij të sigurt, ndërsa vazhdonin të kërkonin në vendngjarje.

Autoritetet njoftuan se trupat e nxjerrë nga vendi i aksidentit po transportohen në Zyrën e Mjekut Ligjor të Qarkut Cowlitz, ku do të zhvillohet procesi i identifikimit dhe njoftimi i familjeve të viktimave.

Hetimet për shkaqet e sakta të shembjes së rezervuarit janë duke vazhduar.