Gjatë 24 orëve të fundit janë raportuar shtatë raste të dhunës në familje në disa qytete të Kosovës, ku në shumicën e rasteve viktimat janë femra, sipas të dhënave të policisë.

Rastet janë regjistruar në Prishtinë, Fushë-Kosovë, Gllogoc, Klinë, Deçan dhe Mitrovicë Jug, ndërsa autoritetet kanë nisur procedurat hetimore për secilin rast veç e veç.

Në Prishtinë janë raportuar dy incidente të ndara. Në njërin rast, pas një mosmarrëveshjeje, një burrë kosovar dyshohet se ka sulmuar fizikisht një grua kosovare. Pas intervistimit, palët janë liruar me vendim të prokurorit, ndërsa rasti vazhdon në procedurë të rregullt.

Në një rast tjetër në kryeqytet, një burrë dyshohet se ka ushtruar dhunë fizike ndaj dy meshkujve. Viktimat janë marrë në pyetje, ndërsa i dyshuari ndodhet në kërkim policor.

Në Fushë-Kosovë, një rast i mosmarrëveshjes mes dy personave, një femër dhe një mashkull kosovar, është trajtuar nga autoritetet, të cilat kanë vendosur që çështja të vazhdojë në procedurë të rregullt pas konsultimit me prokurorin.

Në Gllogoc, një burrë kosovar dyshohet se ka ushtruar dhunë fizike ndaj një mashkulli tjetër, ndërsa rasti po hetohet më tej nga organet kompetente.

Në Klinë është raportuar dhunë psikike ndaj një gruaje, ndërsa në Deçan një person është arrestuar nën dyshimin për ushtrim të dhunës psikike ndaj një viktime femër. Ai është dërguar në mbajtje me vendim të prokurorit.

Ndërkohë, në Mitrovicë Jug një shtetase e huaj ka raportuar se është dhunuar fizikisht dhe psikikologjikisht nga dy persona, një burrë dhe një grua. Viktima ka marrë trajtim mjekësor, ndërsa të dyshuarit janë liruar në procedurë të rregullt pas marrjes në pyetje.

Autoritetet kanë bërë të ditur se të gjitha rastet po trajtohen në bashkëpunim me prokurorinë dhe hetimet vijojnë.