Dymbëdhjetë vende të NATO-s, të udhëhequra nga Mbretëria e Bashkuar, kanë prezantuar projektin Deep Precision Strike, një raketë të re me rreze të gjatë veprimi, për të cilën do të investohen mbi 37 miliardë paund (50 miliardë dollarë) gjatë 10 viteve të ardhshme.
Projekti synon të pajisë aleancën me një armë të aftë për të goditur objektiva ushtarake me precizion të lartë në distanca deri në rreth 2 mijë kilometra, megjithëse sistemi nuk pritet të jetë operacional para viteve 2030.
Kryeministri britanik Keir Starmer deklaroi se iniciativa do të forcojë bashkëpunimin mes aleatëve evropianë dhe do ta bëjë NATO-n më të aftë për t’u përballur me kërcënimet e ardhshme.
Presidenti amerikan Donald Trump vazhdon t’u kërkojë vendeve anëtare të përmbushin objektivin e NATO-s për të investuar 5% të PBB-së në mbrojtje dhe siguri deri në vitin 2035.
Qeveria britanike theksoi se kërcënimi nga Rusia mbetet i lartë, duke nënvizuar se avionët e NATO-s janë ngritur mbi 700 herë për të interceptuar avionë rusë pranë hapësirës ajrore të aleancës, ndërsa aktiviteti ushtarak rus pranë ujërave britanike është rritur me 30%.
Ndërkohë, presidenti ukrainas Volodymyr Zelensky u bëri thirrje aleatëve të përshpejtojnë furnizimin me sisteme të mbrojtjes ajrore, ndërsa Kremlini deklaroi se do të monitorojë nga afër vendimet e samitit dhe se ndihma e re ushtarake për Kievin nuk do ta ndalojë Rusinë të vazhdojë operacionet e saj në Ukrainë.
