Ushtria kanadeze është vënë në gatishmëri për të evakuuar banorët e një komuniteti të largët në provincën Ontario, i cili kërcënohet nga zjarret masive që kanë përfshirë zona të mëdha të vendit dhe kanë dërguar tym të dendur edhe drejt Shteteve të Bashkuara.

Ministrja e Situatave të Emergjencave, Eleanor Olszewski, njoftoi të premten në mbrëmje se ushtria do të përdorë avionë për të larguar rreth 600 banorët e Fort Hope, një komunitet në veriperëndim të Ontarios, ku janë aktivizuar disa prej zjarreve më të rrezikshme. Zona ka një infrastrukturë të kufizuar rrugore dhe mbështetet kryesisht te transporti ajror. Ndërkohë, mijëra persona janë evakuuar tashmë nga rajonet e prekura drejt zonave më jugore të Ontarios.

Sipas Ministrisë Federale të Burimeve Natyrore të Kanadasë, gjatë natës janë raportuar 69 vatra të reja zjarri, duke e çuar numrin total të zjarreve aktive në vend në 955.

Sipërfaqja e djegur deri tani arrin rreth 28 500 kilometra katrorë, një shifër më e ulët se mesatarja e pesë viteve të fundit, por përhapja e tymit ka shkaktuar shqetësime serioze për cilësinë e ajrit në shumë zona të Amerikës së Veriut.

Erërat kanë transportuar tymin përtej kufirit amerikan, duke detyruar autoritetet të lëshojnë paralajmërime shëndetësore për miliona banorë në disa shtete të SHBA-së, përfshirë Pensilvaninë, Nju Xhersin, Virxhinian, Merilendin, Delauerin dhe Uashingtonin. Agjencia amerikane për Mbrojtjen e Mjedisit (EPA) vlerësoi cilësinë e ajrit në disa zona si “të pashëndetshme”, ndërsa pjesë të Pensilvanisë lindore, përfshirë Pitsburgun, u klasifikuan si “shumë të pashëndetshme”.

Ekspertët e klimës thonë se zjarret në Kanada janë bërë një fenomen gjithnjë e më i zakonshëm për shkak të temperaturave më të larta dhe thatësirës, të cilat kanë krijuar kushte ideale për përhapjen e flakëve në pyjet e mëdha të vendit.

Presidenti amerikan Donald Trump ka kritikuar menaxhimin e pyjeve nga Kanadaja, duke e lidhur përhapjen e tymit me atë që ai e cilësoi si politika të dobëta të parandalimit të zjarreve. Në përgjigje të këtyre deklaratave, ministrja Olszewski tha se Kanadaja ka investuar rreth 12 miliardë dollarë kanadezë që nga viti 2020 për mbrojtjen e pyjeve dhe parandalimin e zjarreve, ndërsa vendi përballet me kushte gjithnjë e më të nxehta dhe të thata.

© BalkanWeb
Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb