Një sulm me dron goditi një plazh të mbushur me pushues në jug të Rusisë, duke shkaktuar vdekjen e shtatë personave, mes tyre tre fëmijë, ndërsa 40 të tjerë mbetën të plagosur, sipas autoriteteve lokale.
Pamje të verifikuara nga BBC tregojnë një dron që fluturon me shpejtësi drejt bregut përpara se të shpërthejë në një top zjarri pranë plazhit, ndërsa turistët ndodheshin në breg dhe në det.
Guvernatori i rajonit të Krasnodarit, Veniamin Kondratyev, bëri të ditur se 17 nga të plagosurit janë transportuar në spital. Ai akuzoi Ukrainën për një “sulm të qëllimshëm ndaj civilëve”. Deri më tani, autoritetet ukrainase nuk kanë komentuar mbi ngjarjen, ndërsa të dyja palët në konflikt kanë mohuar vazhdimisht se synojnë civilët.

Ende nuk dihet objektivi i dronit. Disa kanale ukrainase në Telegram pretendojnë se ai devijoi nga kursi pasi iu bllokua sinjali nga sistemet e luftës elektronike. Ndërkohë, dëshmitarë të cituar nga mediat ruse thanë se para shpërthimit u dëgjuan të shtëna me armë, duke ngritur dyshime se mbrojtja ajrore mund të ketë tentuar ta rrëzojë dronin.
Ngjarja ndodhi në plazhin pranë fshatit Arkhipo-Osipovka, një destinacion i njohur turistik në brigjet e Detit të Zi, i frekuentuar nga mijëra pushues rusë, veçanërisht pas kufizimeve të udhëtimeve ndërkombëtare.

Sipas turistëve dhe banorëve, nuk pati asnjë alarm apo sirenë paralajmëruese para shpërthimit.