Një ngjarje e rëndë tragjike ka ndodhur mëngjesin e sotëm në Ksamil, ku një vajzë 4-vjeçare ka humbur jetën pasi është goditur aksidentalisht nga automjeti i drejtuar nga babai i saj.

Ngjarja ka ndodhur në një parkim privat, teksa Ergys Marku po kryente një manovër me automjetin e tij. Gjatë manovrës, automjeti ka goditur vajzën e tij 4-vjeçare, A.M.

Pavarësisht përpjekjeve për ta ndihmuar, e mitura ka ndërruar jetë si pasojë e plagëve të marra.

Policia e Sarandës ka nisur hetimet për të zbardhur rrethanat e plota të ngjarjes dhe për të dokumentuar dinamikën e aksidentit tragjik.

Ksamil/ Informacion paraprak

Rreth orës 11:30, në një parkim privat, pranë plazhit në Ksamil, shtetasi E. M., duke kryer manovrën e parkimit me automjetin tip “Audi”, dyshohet se ka goditur aksidentalisht vajzën e tij, 4 vjeçe.

Si pasojë e përplasjes, e mitura ka humbur jetën në vendngjarje.

Grupi hetimor ndodhet në vendngjarje dhe po kryen veprimet e nevojshme hetimore për dokumentimin dhe zbardhjen e plotë të rrethanave të ngjarjes.