Një valixhe e braktisur në anë të një rruge në një zonë rurale të Australisë shkaktoi alarm dhe nisi një hetim për vrasje, pasi dy kalimtarë pretenduan se kishin zbuluar brenda saj trupin e një gruaje. Ngjarja ndodhi në fshatin e vogël Oallen, në Uellsin e Ri Jugor, rreth 230 kilometra në jugperëndim të Sidneit. Dy burra gjetën valixhen të dielën dhe njoftuan menjëherë autoritetet.

Policia mbërriti në vendngjarje dhe nisi procedurat si për një skenë të mundshme krimi. Për disa orë, gjithçka dukej si një rast i rëndë vrasjeje. Por hetimet mjeko-ligjore sollën një kthesë të pazakontë. Pas ekzaminimeve, policia konfirmoi se “trupi” nuk ishte i një njeriu, por një kukull seksi në përmasa reale, jashtëzakonisht e ngjashme me një person të vërtetë.

“Pas ekzaminimeve mjeko-ligjore, policia ka konfirmuar se objekti i gjetur në çantë ishte një kukull në madhësi reale, e cila mbante veshur rroba, kishte flokë dhe një unazë në hundë”, deklaroi drejtuesja e distriktit policor, Linda Bradbury. Situata ishte bërë edhe më bindëse për shkak se kukulla kishte shenja që ngjanin me mavijosje dhe gërvishtje, duke i bërë autoritetet të trajtonin rastin si një incident potencialisht fatal.

Hetimi nisi të dielën rreth mesditës dhe vazhdoi deri të hënën në mëngjes, kur u konfirmua përfundimisht se nuk bëhej fjalë për një trup njerëzor. Bradbury mbrojti mënyrën se si policia e trajtoi rastin, duke shpjeguar se oficerët nuk mund ta lëviznin apo shqetësonin objektin pa përfunduar ekzaminimet. Me konfirmimin se nuk kishte viktimë, hetimi për një vrasje të mundshme u mbyll.