Presidenti rus Vladimir Putin ka paralajmëruar se Rusia do të reagojë nëse vendet perëndimore përpiqen të konfiskojnë anije tregtare ruse.

Deklarata u bë të mërkurën nga ishulli Sakhalin, ku Putin ndodhet në kuadër të stërvitjeve ushtarake. Kreu i Kremlinit tha se disa vende po përpiqen të kufizojnë lëvizjen e anijeve ruse dhe paralajmëroi se çdo konfiskim do të përballet me masa reciproke.

Sipas Putinit, përgjigjja e Moskës nuk do të kufizohej domosdoshmërisht në të njëjtat zona detare ku mund të ndërhynte Perëndimi, por mund të shtrihej edhe në zona të tjera të botës, përfshirë Oqeanin Paqësor.

Kërcënimi vjen në një kohë tensionesh në rritje rreth transportit detar rus dhe anijeve të lidhura me të ashtuquajturën “flota hije”. Më herët, Moska ka paralajmëruar se konfiskimi i anijeve ruse mund të shkaktojë kundërmasa ndaj mjeteve detare perëndimore.

Putin e ka paraqitur çështjen si një përpjekje për të kufizuar lirinë e lundrimit dhe interesat tregtare të Rusisë, ndërsa vendet perëndimore e lidhin ndalimin e disa anijeve me zbatimin e sanksioneve ndaj Moskës.