Epidemia e virusit të Nilit Perëndimor në Greqi pritet të arrijë kulmin në fund të gushtit, ndërsa rastet mund të mbeten në nivele të larta edhe gjatë muajit shtator. Ekspertët paralajmërojnë se numri real i të infektuarve mund të jetë shumë më i madh se rastet e raportuara, pasi shumica e personave nuk shfaqin simptoma.
Profesori i Epidemiologjisë në Universitetin e Athinës, Dimitris Paraskevis, shpjegon se rreth 80% e personave të infektuar mund të mos kenë simptoma, ndërsa rreth 20% mund të shfaqin shenja të lehta, si temperaturë, dhimbje koke, dhimbje muskujsh dhe lodhje. Më pak se 1% e të infektuarve zhvillojnë forma të rënda të sëmundjes.
Sipas ekspertëve, aktiviteti viral këtë vit është i krahasueshëm me atë të vitit 2018, kur u regjistrua një qarkullim i shtuar i virusit. Edhe pse kulmi zakonisht shënohet në fund të gushtit, rastet mund të vazhdojnë të shfaqen gjatë shtatorit, por me intensitet më të ulët. Rreziku për komplikacione të rënda është më i lartë tek të moshuarit, personat me imunitet të dobësuar dhe ata që vuajnë nga sëmundje kronike.
Shenjat më shqetësuese janë ato që prekin sistemin nervor qendror, përfshirë dhimbjen e fortë të kokës, ngurtësimin e qafës, çrregullimet e ndërgjegjes dhe simptomat neurologjike. Ekspertët theksojnë se rëndesa e sëmundjes nuk mund të parashikohet gjithmonë nga simptomat e para. Autoritetet greke po zbatojnë Planin Kombëtar të Veprimit për Virusin e Nilit Perëndimor, në bashkëpunim me Organizatën Kombëtare të Shëndetit Publik dhe institucionet përgjegjëse.
Mbrojtja nga mushkonjat mbetet masa kryesore parandaluese. Ekspertët rekomandojnë përdorimin e repelentëve, veshje që mbulojnë pjesën më të madhe të trupit dhe vendosjen e rrjetave mbrojtëse në dritare e dyer. Po ashtu, këshillohet eliminimi i ujit të ndenjur në ballkone, kopshte dhe oborre, përfshirë edhe sasi të vogla uji në vazo lulesh, enë apo objekte të tjera, pasi ato mund të shërbejnë si vende shumimi për mushkonjat. Ndryshimet klimatike dhe temperaturat më të larta po shqyrtohen si faktorë që mund të favorizojnë përhapjen e virusit, megjithëse ekspertët theksojnë se nevojitet monitorim i mëtejshëm për të përcaktuar nëse bëhet fjalë për një trend afatgjatë.
