Një person është shtruar në spital në Holandë pasi është infektuar me virusin e Nilit Perëndimor, njoftoi Instituti Kombëtar Holandez për Shëndetin Publik dhe Mjedisin (RIVM).

Instituti kishte raportuar javën e kaluar rastin e parë të infektimit me virusin e Nilit Perëndimor në Holandë që nga viti 2020. Sipas RIVM, numri i personave të infektuar në vend mund të jetë tashmë tre.

Ndërkohë, nuk dihet nëse personi i shtruar në spital është një nga rastet e raportuara më herët. Autoritetet holandeze nuk kanë dhënë detaje të tjera për gjendjen e tij shëndetësore.

Virusi i Nilit Perëndimor transmetohet te njerëzit kryesisht përmes pickimit të mushkonjave. Sipas Organizatës Botërore të Shëndetësisë (OBSH), rreth një në 150 persona të infektuar mund të zhvillojë një sëmundje akute dhe potencialisht kërcënuese për jetën.

OBSH ka paralajmëruar se temperaturat më të larta po krijojnë kushte më të favorshme për mushkonjat, duke u dhënë atyre më shumë kohë dhe hapësirë për përhapjen e virusit në Evropë. Gjatë kësaj vere, raste të virusit janë raportuar në rritje edhe në vende si Greqia dhe Italia.

Megjithatë, RIVM thekson se mbetet “shumë e pamundur” që njerëzit të infektohen me virusin e Nilit Perëndimor brenda Holandës.