Situata nga zjarret në Njësinë Administrative Ulëz, në Bashkinë Mat, vijon të jetë kritike. Prej tre ditësh, zjarri ka dalë jashtë kontrollit, duke përfshirë një sipërfaqe të konsiderueshme të zonës në Lundëre dhe masivin pyjor të Trodhenit.

Gjatë natës së mbrëmshme, flakët janë përhapur me shpejtësi edhe në fshatin Madhesh, duke rrezikuar fermat dhe gjënë e gjallë të banorëve, raporton gazetari Enver Doçi.

Sipas banorëve të zonës, në një fermë ndodhen rreth 250 lopë, si dhe një numër i konsiderueshëm bagëtish të imta, kryesisht dele e dhi, dhe disa koshere bletësh. Zona është mbuluar nga tymi i dendur, ndërsa raportohet se disa krerë bagëtish nuk janë gjetur që prej nisjes së zjarrit.

Pavarësisht ndërhyrjes së një helikopteri prej dy ditësh dhe angazhimit të forcave të shumta në terren, flakët vijojnë të jenë jashtë kontrollit. Raportohet se deri më tani janë djegur qindra hektarë pyje, me pisha, dushqe dhe lloje të tjera bimësie.

Banorët bëjnë apel për ndërhyrje urgjente dhe më shumë mjete ajrore, pasi zjarri po përparon drejt territorit të Krujës, duke rritur rrezikun për përhapjen e mëtejshme të flakëve. Në terren për shuarjen e flakëve janë dhe punonjësit e zonave të mbrojtura.