Një mumje e lashtë egjiptiane, fytyra e së cilës ka mbetur e ngrirë në një shprehi që duket si një britmë, ka intriguar shkencëtarët për afro 3,000 vjet.

Mumja e një gruaje të paidentifikuar u zbulua në vitin 1935 në Tebë, në Egjipt. Kur arkeologët ekzaminuan fytyrën e saj, u përballën me një pamje të pazakontë: goja e hapur dhe tiparet e deformuara dukeshin sikur gruaja kishte vdekur duke bërtitur.

Fillimisht u mendua se shkak mund të ishte një proces i dobët mumifikimi. Megjithatë, studimet e mëvonshme treguan të kundërtën. Gruaja ishte varrosur pranë familjes së Senmutit, arkitektit mbretëror të faraones Hatshepsut, dhe trupi i saj ishte trajtuar me materiale të kushtueshme.

Në mumifikim ishin përdorur rrëshira të importuara, përfshirë temjan nga vendi i lashtë i Puntit, si dhe rrëshirë dëllinje. Ajo kishte gjithashtu një paruke të përpunuar me fibra palme hurme, të lyer me këna dhe të dekoruar me një përzierje mineralesh. Të gjitha këto tregojnë se gruaja i përkiste një shtrese të pasur të shoqërisë egjiptiane.

Në vitin 2024, mumja u ekzaminua nga radiologia e mumjeve Sahar Saleem, nga Universiteti i Kajros, dhe Samia El-Merghani, nga Ministria egjiptiane e Turizmit dhe Antikiteteve. Studiuesit përdorën skanime me rreze X dhe CT, si dhe analiza të avancuara mikroskopike dhe kimike.

Ekzaminimet treguan se gruaja ishte rreth 1.52 metra e gjatë dhe kishte vdekur në moshën afërsisht 48-vjeçare. Ajo kishte shenja konsumimi në dhëmbë dhe kyçe, ndërsa krahët i kishte të vendosur përgjatë trupit.

Shkencëtarët nuk arritën të përcaktonin me siguri shkakun e vdekjes. Në mesin e mundësive të ngritura janë një atak në zemër, goditja në tru, këputja e një aneurizme apo edhe një helmim i mundshëm nga një gjarpër.