Kryebashkiaku i Patosit, Fation Duro këmbëngul se institucioni që ai drejton të mos shkrihet me Bashkinë Fier. Gjatë konsultimit publik të mbajtur me qytetarët për reformën territoriale, kryebashkiaku socialist argumentoi se indeksi i funksionalitetit të Bashkisë Patos është më i lartë se ai i Bashkisë Fier, gjë që ngre pikëpyetje për shërbimet që do të marrin qytetarët nëse propozimi i mazhorancës miratohet nga Kuvendi.

Kryebashkiaku Duro vuri theksin edhe te përfaqësimi në këshillin bashkiak të Bashkisë së Madhe Fier, ku Patosi mund të ketë 3 këshilltarë. Sipas tij, 3 këshilltarë nuk do të kenë asnjëlloj ndikimi në vendimmarrje.

Këshilltarët thonë se drejtuesja politike e qarkut Fier, Belinda Balluku i ka prerë në besë, pasi pak kohë më parë iu premtoi se Bashkia Patos nuk do të zhbëhet, duke kërkuar prej saj të ngrejë kartonin kundër në Kuvend.

Procesi i konsultimit publik do të vijojë edhe në njësitë administrative që përbëjnë Bashkinë Patos.