Një anije cisternë nafte me flamur panamez, “El Gaia”, shpërtheu dhe u përfshi nga flakët në Ngushticën e Hormuzit, pasi dyshohet se goditi mina, sipas Gardës Revolucionare të Iranit. Lajmi u raportua të hënën nga agjencia iraniane Fars, por nuk është përcaktuar saktësisht se kur ka ndodhur incidenti.
Megjithatë, pretendimi iranian është kundërshtuar nga Komanda Qendrore e SHBA-së (CENTCOM). Sipas saj, tankeri “El Gaia” nuk është goditur nga një minë në Ngushticën e Hormuzit.
Sipas informacionit të publikuar, anija ishte goditur nga një raketë iraniane muajin e kaluar, ndërsa gjatë fundjavës u sulmua me dronë pranë brigjeve të Omanit. Aktualisht, ajo po tërhiqet nga zona.
Incidenti merr rëndësi të veçantë për shkak të deklaratave të mëparshme të Presidentit amerikan Donald Trump lidhur me sigurinë e Ngushticës së Hormuzit. Disa javë më parë, Trump deklaroi se të gjitha minat në ujërat ndërkombëtare të kësaj rruge strategjike ishin hequr ose shkatërruar.
“Të gjitha minat janë hequr ose shpërthyer në ujërat ndërkombëtare të Ngushticës së Hormuzit”, kishte shkruar Trump.
Ngushtica e Hormuzit është një nga korridoret më të rëndësishme detare për transportin global të naftës. Çdo incident me anije cisternë në këtë zonë rrit shqetësimet për sigurinë e lundrimit dhe furnizimet energjetike.
Në rastin e “El Gaia”, megjithatë, mbeten të paqarta rrethanat e sakta të shpërthimit, ndërsa versioni i Gardës Revolucionare iraniane dhe ai i CENTCOM-it janë në kundërshtim me njëri-tjetrin. Deri në këtë fazë, nuk ka një konfirmim të pavarur për shkakun e incidentit.
