Deputetja e Partisë Demokratike dhe kryetarja e Komisionit për të Drejtat e Njeriut dhe Mjetet e Informimit Publik, Jorida Tabaku, deklaroi se zhvillimet që përfshijnë drejtuesen e SHISH-it dhe ish-kreun e Policisë së Shtetit janë goditje e rëndë për besimin e qytetarëve te institucionet e sigurisë.*

Deputetja e Partisë Demokratike, Jorida Tabaku, e nisi mbledhjen e sotme të Komisionit për të Drejtat e Njeriut dhe Mjetet e Informimit Publik me një deklaratë të fortë për zhvillimet e fundit që lidhen me drejtuesen e SHISH-it, Vlora Hyseni, dhe ish-drejtorin e Përgjithshëm të Policisë së Shtetit, Ilir Proda.

Tabaku tha se vendimi i Gjykatës së Posaçme për masën “arrest në shtëpi” dhe pezullimin nga detyra të Hysenit, pas kërkesës së SPAK-ut, si dhe kontrollet e autorizuara ndaj Prodës, përbëjnë një zhvillim tronditës për shtetin shqiptar.

“Nuk besoj se dje ka qenë një ditë e mirë për Shqipërinë. Ne jemi opozitë, por nuk gjetëm asnjë lajm të mirë në marrjen nën hetim të kreut të SHISH-it. Ishte një lajm i trisht për Shqipërinë, për shtetin shqiptar dhe për besimin që kemi te SHISH-i”, u shpreh Tabaku.

Sipas saj, pezullimi i drejtueses së shërbimit sekret dhe akuzat e ngritura nga SPAK-u kanë cenuar themelet e shtetit dhe reputacionin ndërkombëtar të vendit.

“Ajo që pamë ishte një pasqyrë besnike se kujt i ka dhënë besën qeveria shqiptare. Ata i kanë dhënë besën një pakice, krimit të organizuar dhe korrupsionit”, deklaroi deputetja demokrate.

Tabaku kritikoi heshtjen e Parlamentit, duke theksuar se një zhvillim i tillë duhej të ishte vendosur menjëherë në qendër të debatit politik dhe institucional.

“Edhe si përfaqësuese e opozitës, edhe si kryetare e komisionit, do të kisha dëshiruar që Parlamenti të ishte ngritur në këmbë dhe ta kishte këtë çështje në majë të gjuhës e në qendër të debatit. Kjo nuk është një çështje që duhet të na ndajë në të majtë dhe të djathtë. Është një çështje e Shqipërisë, e reputacionit dhe e emrit të vendit tonë”, tha ajo.

Tabaku kujtoi se Partia Demokratike kishte ngritur më herët publikisht pikëpyetje dhe shqetësime për drejtimin e SHISH-it. Ajo iu referua qëndrimit të Gazment Bardhit në vitin 2023, kur ky i fundit i kërkoi Presidentit të Republikës transparencë dhe informacion për arsyet e largimit të Hysenit nga institucionet e inteligjencës në Kosovë.

“Duhet të jemi të pjekur dhe ta duam vendin tonë më shumë sesa partinë. Këtë çështje duhet ta trajtojmë si një çështje të Shqipërisë”, theksoi Tabaku.

Në mbyllje, ajo e cilësoi situatën si dëshmi të cenimit të strukturave kryesore të shtetit dhe kërkoi përgjegjësi institucionale.

“Me trishtim i bëj këto komente dhe e ngre këtë shqetësim. Sot, strukturat e shtetit kanë rënë dhe janë cenuar, ndërkohë që Shqipëria duhet të ishte në një dinamikë dhe në një proces krejt tjetër”, përfundoi Tabaku.

Vlora Hyseni dhe personat e tjerë nën hetim prezumohen të pafajshëm derisa fajësia e tyre të provohet me vendim gjyqësor të formës së prerë.

Fjala e Tabakut në Komision

“Nuk besoj se dje ka qenë një ditë e mirë për Shqipërinë. Ne jemi opozitë dhe, ndonëse jemi në kahe të ndryshme, nuk gjetëm asnjë lajm të mirë në marrjen nën hetim të kreut të SHISH-it, Vlora Hyseni.

Ishte një lajm i trishtë për Shqipërinë, për shtetin shqiptar dhe për besimin që kemi te SHISH-i. Pezullimi nga detyra i drejtueses së SHISH-it dhe, njëkohësisht, akuzat e ngritura nga SPAK-u kanë cenuar themelet e shtetit.

Ajo që pamë dje ishte një pasqyrë besnike se kujt i ka dhënë besën qeveria shqiptare. Ata i kanë dhënë besën një pakice, krimit të organizuar dhe korrupsionit.

Edhe si përfaqësuese e opozitës, edhe si kryetare e komisionit, do të kisha dëshiruar që Parlamenti të ishte ngritur në këmbë dhe ta kishte këtë çështje në majë të gjuhës e në qendër të debatit.

Kjo nuk është një çështje që duhet të na ndajë në të majtë dhe të djathtë. Është një çështje e Shqipërisë, që lidhet me reputacionin dhe emrin e vendit tonë.

Për të thënë të vërtetën, ka pasur akuza të shumta ndaj kreut të SHISH-it për përfshirje dhe bashkëpunim të dyshuar me elementë të krimit të organizuar, të cilët janë nën hetim. Ka akuza për ish-zëvendëskryeministren, ka akuza ndaj AKSHI-t dhe ka akuza ndaj ish-drejtorit të Policisë së Shtetit.

Madje, zoti Bardhi, të cilin e kemi sot këtu, në vitin 2023 i kërkoi Presidentit të Republikës transparencë dhe informacion për zonjën Hyseni, pasi disa vite më parë ajo ishte larguar nga institucioni homolog në Kosovë.

Ne duhet të jemi të pjekur dhe ta duam vendin tonë më shumë sesa partinë. Këtë çështje duhet ta trajtojmë si një çështje të Shqipërisë.

Unë besoj se nuk ka pasqyrë më të qartë dhe dëshmi më besnike për këtë shumicë sesa ajo që SPAK-u na vërtetoi.

Me trishtim i bëj këto komente. Me trishtim e ngre shqetësimin se sot të gjitha strukturat e shtetit kanë rënë dhe janë cenuar, ndërkohë që Shqipëria duhet të ishte në një dinamikë dhe në një proces tjetër.”