Presidenti amerikan Donald Trump ka shtruar një drekë për disa prej figurave më të fuqishme të industrisë së teknologjisë dhe inteligjencës artificiale, duke mbledhur në të njëjtën tavolinë drejtues kompanish me pasuri të jashtëzakonshme dhe rivalitete të njohura mes tyre.

Fotografia nga dreka në Shtëpinë e Bardhë ka tërhequr vëmendjen për përbërjen e tryezës, ku pasuria e personave të pranishëm vlerësohet në më shumë se një trilion dollarë.

Në krah të Trump ishte Jensen Huang, drejtuesi i Nvidia-s, ndërsa në anën tjetër u ul Elon Musk. Në tavolinë ishin gjithashtu Mark Zuckerberg, themeluesi i Facebook-ut, Sundar Pichai i Google, Jeff Bezos i Amazon dhe Satya Nadella i Microsoft-it.

Në takim mori pjesë edhe kryetari i Dhomës së Përfaqësuesve të SHBA-së, Mike Johnson.

Një nga temat kryesore të diskutimit ishte zhvillimi i inteligjencës artificiale dhe mënyra se si duhet të rregullohet sektori. Trump u shpreh në favor të një qasjeje që mbështetet më shumë te vetërregullimi i industrisë, duke kundërshtuar nevojën për kufizime të mëtejshme nga Kongresi.

Presidenti amerikan deklaroi se “vetërregullimi masiv” duhet të jetë rruga përpara në zhvillimin e teknologjive të inteligjencës artificiale.

Një tjetër temë e diskutuar ishte zgjerimi i qendrave të të dhënave në SHBA, të cilat janë bërë një komponent thelbësor i zhvillimit të inteligjencës artificiale.

Trump mbrojti ndërtimin e këtyre objekteve, duke deklaruar se ato do të bëhen gjithnjë e më të rëndësishme dhe se zonat ku ndërtohen po përfitojnë ekonomikisht.

“Zonat e qendrave të të dhënave janë bërë shumë të pasura”, tha Trump, duke shtuar se banorët e këtyre zonave kanë përfituar nga ulja e taksave dhe zhvillimet ekonomike.

Komentet e presidentit vijnë ndërsa ndërtimi i qendrave të mëdha të të dhënave ka shkaktuar debate në disa komunitete amerikane, për shkak të ndikimit të tyre në energji, ujë, infrastrukturë dhe mjedis.