Kryetari i Partisë Mundësia, Agron Shehaj, akuzoi kryeministrin Edi Rama se ndryshimet e propozuara në Kodin e Procedurës Penale synojnë të lirojnë bashkëpunëtorët e tij që janë nën hetim apo përballë drejtësisë.
“Edi Rama doli zbuluar! Ja ku e keni projektligjin nëpërmjet të cilit do të nxjerrë nga burgu Erion Veliajn dhe do të pengojë arrestimin e Belinda Ballukut dhe të bashkëpunëtorëve të tjerë të akuzuar për korrupsion”, deklaroi Shehaj.
Sipas kryetarit të Partisë Mundësia, projektligji kufizon arrestin me burg dhe vendos kufij të rinj për mbledhjen e provave nga pajisjet elektronike.
“Projektligji detyron gjykatat të rishikojnë brenda 60 ditëve masat e sigurimit që janë sot në fuqi. Kufizon arrestin me burg dhe në plot raste e bën atë të pamundur. Po ashtu, vendos kufij për marrjen e provave nga celularët dhe kompjuterët.”
Sipas Shehajt, ndryshimet synojnë të dobësojnë instrumentet që drejtësia ka në dispozicion.
“Rama i pret krahët drejtësisë me projektligjin e sotëm. Si e si të ndalojë drejtësinë.”
Në fund, ai bëri thirrje për mbështetjen e institucioneve të drejtësisë.
“Prandaj duhet të mbështesim drejtësinë, sepse nëse këtë luftë e fiton Rama, do të humbasim të gjithë. Do të humbasim të ardhmen tonë.”
