Deputeti i PD-së, Klevis Balliu, komentoi protestat para QSUT-së, ku ishte i pranishëm kryeministri Edi Rama dhe ku gazetari i News24, Osman Stafa, u ndalua nga policia që të mos i afrohej kreut të qeverisë.

I ftuar në emisionin “Minuta e Parë” me Ola Brukon, Balliu tha se kishte pritur një reagim edhe më të ashpër ndaj gazetarit.

“Prisja dhe më shumë! Janë sjellë mirë, se prisja të godisnin dhe gazetarin tuaj. I shtyjnë, i kërcënojnë. Siç ndodhi dhe me zonjën Klodiana Lala me deklaratat e zonjës Vlora Hyseni. Çfarë të thotë Rama për ilaçet që mungojnë te Onkologjiku?! Mediat që bëjnë pyetje, janë armiku nr. 1 dhe ato që bëjnë ‘skandale’, shpikin të tilla, janë miqtë. Zoti Stafa ka vite që ngre probleme të shëndetësisë. Një kryeministër, gazetarin e tillë, duhet ta dekorojë. S’ka bojë në spitale që mund t’i hedhë hi syve qytetarëve. Qeveria nuk ka kohë më për shqiptarët, por të shpëtojë kokën e Ramës nga burgu.”, tha Balliu.