Deri në 500 shkolla të mesme në të gjithë Francën pritet të mbyllen pjesërisht ose plotësisht të hënën, pas përshkallëzimit të protestave të studentëve dhe përleshjeve me policinë gjatë ditëve të fundit.
Ministri francez i Arsimit, Édouard Geffray, deklaroi të dielën se mësimi do të pezullohet “plotësisht ose pjesërisht” në rreth 400 deri në 500 shkolla, pasi kushtet e sigurisë nuk janë përmbushur.
Sipas tij, që nga nisja e protestave, 24 shkolla janë “djegur ose plaçkitur”, ndërsa 78 pjesëtarë të stafit arsimor kanë mbetur të plagosur. Geffray e cilësoi situatën si të paprecedentë, duke paralajmëruar se protestat përbëjnë rrezik si për nxënësit, ashtu edhe për personelin e shkollave.
Protestat nisën javën e kaluar në Paris dhe më pas u përhapën në qytete të tjera të Francës, përfshirë Montpellier, Nantes dhe Marseille. Mijëra nxënës të shkollave të mesme kanë dalë në rrugë për të kundërshtuar mungesën e mësuesve, klasat e mbipopulluara dhe gjendjen e rënduar të ndërtesave shkollore.
Situata është përshkallëzuar gjatë ditëve të fundit, me përplasje mes protestuesve dhe policisë së trazirave. Ministri i Drejtësisë, Gérald Darmanin, deklaroi të premten se 735 nga rreth 3,700 shkollat e Francës ishin prekur “në një mënyrë ose në një tjetër” nga protestat e dhunshme.
Ndërkohë, ministri i Brendshëm Laurent Nuñez bëri me dije se vetëm të premten u arrestuan 1,747 persona. Sipas AFP-së, numri total i të arrestuarve që nga fillimi i lëvizjes ka kaluar 5,000, ndërsa rreth 85% e tyre janë të mitur.
Ministri i Arsimit paralajmëroi se numri i shkollave të prekura të hënën mund të jetë i ngjashëm me atë të së premtes, por premtoi një “kthim të pjesshëm dhe progresiv në mësime”.
Geffray akuzoi gjithashtu persona të lidhur me të majtën ekstreme se janë infiltruar në lëvizjen studentore dhe se kanë nxitur akte dhune. Sipas tij, kjo situatë ka krijuar një rrezik serioz për sigurinë në shkolla.
Protestat pritet të vijojnë edhe gjatë ditëve në vazhdim. Organizatorët kanë bërë thirrje për demonstrata të tjera të martën, duke akuzuar qeverinë se nuk ka ndërmarrë masa konkrete për zgjidhjen e problemeve të arsimit.
Kryeministri francez, Sébastien Lecornu, tha të dielën se qeveria po ndërmerr hapa për të adresuar problematikat me të cilat përballen nxënësit dhe stafi arsimor. Masat përfshijnë përmirësimin e ambienteve shkollore, organizimin e ditës mësimore dhe rritjen e transparencës së platformës së pranimeve në universitete.
Qeveria po përshpejton gjithashtu shqyrtimin e projektligjit të njohur si “vandali paguan”, i cili synon që personat përgjegjës për dëmtimet gjatë protestave të përballojnë kostot e shkaktuara prej tyre.
