Presidenti i Shteteve të Bashkuara, Donald Trump, ka bërë deklarata të forta për situatën e sigurisë në Meksikë, duke pretenduar se organizatat e trafikut të drogës kanë ndikim vendimtar në drejtimin e vendit.

Gjatë një deklarate, Trump tha se këtë shqetësim ia ka përcjellë edhe presidentes meksikane, Claudia Sheinbaum, për të cilën u shpreh me vlerësime pozitive, pavarësisht kritikave ndaj situatës në vend.

“Kartelet e drogës e drejtojnë Meksikën”, deklaroi presidenti amerikan, duke përsëritur qëndrimin e tij për fuqinë e grupeve kriminale në territorin fqinj.

Deklaratat e tij vijnë në një kohë kur lufta kundër trafikut të narkotikëve dhe dhuna e lidhur me kartelet mbeten ndër çështjet më të ndjeshme në marrëdhëniet mes Uashingtonit dhe Meksikos. Trump ka kërkuar vazhdimisht që autoritetet meksikane të ndërmarrin masa më të forta për të goditur rrjetet kriminale dhe për të ndaluar furnizimin e tregut amerikan me drogë.

Nga ana e saj, qeveria e Claudia Sheinbaum përballet me presionin për të përmirësuar sigurinë dhe për të luftuar grupet e organizuara kriminale, ndërsa synon të mbrojë njëkohësisht sovranitetin e Meksikës dhe të ruajë marrëdhëniet me Shtetet e Bashkuara.

Trafikimi i lëndëve narkotike, përplasjet mes organizatave kriminale dhe ndikimi i tyre në disa zona të vendit kanë qenë prej kohësh burim shqetësimi për autoritetet dhe qytetarët.