ATP po përgatit një reformë të rëndësishme të kalendarit të tenisit profesionist, e cila pritet të hyjë në fuqi në vitin 2028, në të njëjtën kohë me organizimin e turneut të ri Masters 1000 në Arabinë Saudite. Presidenti Andrea Gaudenzi synon të ulë presionin mbi lojtarët, duke rishikuar sistemin e pikëve, turnetë e detyrueshme dhe shpërndarjen e shpërblimeve financiare.
Një nga propozimet kryesore është heqja e rregullit që u lejon lojtarëve të zëvendësojnë rezultate të dobëta në Masters 1000 me paraqitje më të mira në turnetë ATP 500 dhe ATP 250. Sipas drejtuesve të ATP-së, kjo dispozitë i shtyn tenistët të garojnë më shpesh për të rikuperuar pikët e humbura.
Debati është bërë edhe më i fortë pas dëmtimeve të Karlos Alkarazit dhe Janik Sinerit. Ndërkohë, kalendari vazhdon të zgjerohet, me shtatë turne Masters 1000 që zhvillohen tashmë përgjatë 12 ditëve. Në vitin 2028, Arabia Saudite do të presë turneun e dhjetë të kësaj kategorie, me 56 lojtarë, por pa pjesëmarrje të detyrueshme.
ATP-ja synon gjithashtu të rrisë fondin e shpërblimeve nga 21,5 në 50 milionë dollarë. Sfida kryesore mbetet gjetja e ekuilibrit mes interesave ekonomike, lirisë së lojtarëve dhe nevojës për të shmangur mbingarkesën fizike.
