Reperi i njohur nga Kosova, Capital T, ka shprehur publikisht mbështetjen e tij për qytetarët që po protestojnë në Shqipëri, duke u bërë thirrje mediave në Kosovë që t’u kushtojnë më shumë vëmendje zhvillimeve kritike në Tiranë.
Përmes një reagimi në rrjetet sociale, artisti vuri theksin te rëndësia e informimit të drejtë dhe të pavarur, duke kërkuar që zëri i protestuesve të mos mbetet në hije. Ai nënvizoi se gazetaria luan një rol thelbësor në pasqyrimin e së vërtetës, evidentimin e shkeljeve të mundshme dhe informimin e publikut për çështjet me interes të lartë publik.
View this post on Instagram
Pas këtij qëndrimi publik, sipas një audioje të publikuar nga Dosja.al, Capital T është kontaktuar në telefon nga një person që është prezantuar si oficer i policisë kriminale në Tiranë, i cili i ka kërkuar llogari për vendndodhjen dhe datën e kthimit në Shqipëri.
Transkripti i bisedës mes efektivit dhe artistit zbardh detajet e këtij komunikimi:
Biseda në telefon:
Niko Kurti: Jam oficer te Myslim Shyri në Tiranë. Ku jeni?
Capital T: Mirëmëngjes, jam në Amerikë.
Niko Kurti: Kur do ktheheni.
Capital T: Nuk kam ndonjë datë. Më pyet.
Niko Kurti: Nuk është bisedë që bëhet në telefon. Kur ke ik në Amerikë?
Capital T: Kam ca ditë?
Niko Kurti: Një sekond mos ma mbyll, një sekond të lutem!
Capital T: Këtu jam pa merak.
Niko Kurti: Më dëgjon tani, nuk ma the kush ishe?
Capital T: Kë kërkon vëlla?
Niko Kurti: Trim Ademi je?
Capital T: Po
Niko Kurti: Kur të vish do të pyes, të sqaroj për një rrethanë.
Capital T: Po mirë për ca bëhet fjalë
Niko Kurti: Mos u shqetëso se me qenë s’do të merrnim në telefon. Kur të vish në Tiranë hajde këtu te puna dhe flasim.
Ndonëse nga përmbajtja e bisedës nuk specifikohet arsyeja e saktë e këtij interesi policor, thirrja ndaj një prej artistëve më të njohur mbarëshqiptarë pas mbështetjes së dhënë për protestat ka ngritur shqetësime të forta mbi përdorimin e strukturave të rendit për intimidimin e zërave publikë kritikë.
