Më shumë se 50 mijë persona humbën jetën në Evropë gjatë verës së vitit 2026 për shkak të temperaturave ekstreme, ndërsa rreth 32 mijë prej këtyre vdekjeve i atribuohen ndryshimeve klimatike. Të dhënat janë publikuar në dy studime të botuara në revistën akademike “Nature Health”.

Sipas studimeve, vera e këtij viti rezulton më vdekjeprurësja e shekullit XXI për sa u përket vdekjeve të lidhura me të nxehtin, duke tejkaluar ndjeshëm shifrat e regjistruara në vitet e mëparshme.

Hulumtimi u krye nga shkencëtarë të Imperial College London dhe London School of Hygiene and Tropical Medicine. Ai përfshiu 854 qytete në Bashkimin Evropian, Mbretërinë e Bashkuar, Norvegji dhe Zvicër, ku jeton rreth 40 për qind e popullsisë së 30 vendeve të marra në studim.

Sipas raportimit të “Politico”, shifrat e vitit 2026 tejkalojnë rekordet e mëparshme, kur rreth 29 mijë vdekje të lidhura me nxehtësinë u regjistruan në vitin 2022 dhe rreth 28 mijë në vitin 2003.

Të dhënat nënvizojnë ndikimin e temperaturave ekstreme në shëndetin publik dhe shqetësimet në rritje për pasojat e ndryshimeve klimatike në Evropë.