Një person ka humbur jetën dhe pesë të tjerë janë plagosur pas një sulmi me armë zjarri në Trappes dhe La Verrière, në jugperëndim të Parisit. Mes të plagosurve është edhe një vajzë 12-vjeçare, ndërsa tre persona kanë pësuar lëndime të rënda. Autori i dyshuar është arrestuar dhe hetimet janë marrë në dorë nga Prokuroria Kombëtare Antiterroriste e Francës.
Presidenti Emmanuel Macron e cilësoi ngjarjen “një sulm terrorist racist” dhe “një pikë kthese në jetën e Republikës dhe kombit tonë”. Ai theksoi se akte të tilla nuk kanë vend në Francë.
Sulmi ndodhi të premten në mëngjes dhe, sipas zyrtarëve, zgjati rreth 15 minuta. I dyshuari lëvizte me një Renault Clio gri, duke hapur zjarr ndaj personave që haste gjatë rrugës.
Kryebashkiaku i Trappes, Ali Rabeh, tha se sulmuesi kishte qëlluar në disa zona, përfshirë një pikë karburanti, një qendër mjekësore dhe një kënd lojërash, përpara se të vijonte drejt La Verrière.
Sipas tij, autori qëllonte pa dallim, me synimin e dukshëm për të shkaktuar sa më shumë viktima.
“Ai donte të shkaktonte masakër”, deklaroi Rabeh.
Prokuroria Kombëtare Antiterroriste e identifikoi të dyshuarin si Kevin T. Sipas raportimeve të mediave franceze, ai është 39 vjeç dhe kishte katër dënime të mëparshme. Ishte i njohur për policinë, por jo për shërbimet e inteligjencës dhe nuk figuronte në listën e personave të konsideruar kërcënim serioz për sigurinë kombëtare.
Në kuadër të hetimit është ndaluar edhe një person nga rrethi i tij i ngushtë familjar.
Autoritetet po hetojnë për vrasje të lidhur me veprimtari terroriste, duke shqyrtuar edhe rrethanën rënduese të shënjestrimit të viktimave për shkak të përkatësisë së tyre reale ose të perceptuar racore, etnike, kombëtare apo fetare.
Kryebashkiaku tha se personi i vrarë ishte me origjinë afrikane, ndërsa një prej të plagosurve në gjendje kritike ishte me prejardhje nga Afrika e Veriut. Ai ngriti dyshime për motive raciste dhe ndoshta islamofobike. Megjithatë, prokuroria bëri thirrje për kujdes lidhur me identitetin e viktimave, ndërsa ministri i Brendshëm, Laurent Nuñez, tha se motivi i saktë mbetej për t’u zbardhur.
Nëna e vajzës 12-vjeçare i tha radios RTL se e bija kishte pësuar tetë plagë nga të shtënat dhe kishte nevojë për ndërhyrje kirurgjikale. Ajo tregoi se vajza mbante shami dhe ngriti pikëpyetjen nëse kjo mund të kishte qenë arsyeja e shënjestrimit të saj.
“Si mund t’ia bënte dikush këtë një fëmije?”, u shpreh nëna.
Hetimet përfshijnë gjithashtu posedimin e një arme të kategorisë A dhe dyshimet për përgatitjen e krimeve kundër personave në kuadër të një grupi terrorist.
