“Vrasës me pagesë” është mesazhi që protestuesit kanë shkruar në asfalt në Rrugën e Durrësit, në Tiranë, gjatë ditës së 13-të të revoltës studentore kundër qeverisë së kryeministrit Edi Rama.

Mbishkrimi është një tjetër shprehje e zemërimit të të rinjve ndaj dhunës së pretenduar policore gjatë protestave të ditëve të fundit, të cilat janë shoqëruar me përplasje, përdorim të gazit lotsjellës, ujit me presion dhe plumbave të gomës.

Mesazhi i shkruar në rrugë vjen pas plagosjes së rëndë të 28-vjeçarit Erjon Vishkulli, i cili u godit në syrin e majtë nga një plumb gome gjatë protestës në kryeqytet. I riu rrezikon të humbasë shikimin dhe pritet të marrë trajtim të specializuar mjekësor në Itali.

Plagosja e tij ka nxitur reagime të shumta dhe ka rikthyer në qendër të vëmendjes mënyrën e ndërhyrjes së forcave të rendit ndaj demonstruesve.

Ndërkohë, kryeministri Edi Rama ka mbrojtur nevojën për masa më të ashpra kundër dhunës gjatë tubimeve, duke prezantuar një paketë të re ligjore që parashikon gjoba deri në 500 mijë lekë të reja dhe kufizime të tjera për pjesëmarrësit në protesta të dhunshme.

Propozimet kanë shkaktuar reagime nga studentë, aktivistë dhe përfaqësues të opozitës, të cilët i konsiderojnë ato një përpjekje për të kufizuar të drejtën e protestës.

Këtë të diel, studentë, të rinj dhe qytetarë kanë nisur të grumbullohen përpara Ministrisë së Arsimit, duke vijuar revoltën që ka përfshirë kryeqytetin prej 13 ditësh.